പാമ്പ് കടിയേറ്റ് മൂന്നുവയസുകാരി മരിച്ച സംഭവം; ഡ്യൂട്ടി ഡോക്ടര്ക്കെതിരേ അന്വേഷണ റിപോര്ട്ട്
തൃശൂര്: പൊയ്യ കൃഷ്ണന്കോട്ടയില് പാമ്പ് കടിയേറ്റ് മൂന്നുവയസുകാരി മരിച്ച സംഭവത്തില് കൊടുങ്ങല്ലൂര് താലൂക്ക് ആശുപത്രി ഡ്യൂട്ടി ഡോക്ടര്ക്കെതിരെ അന്വേഷണ റിപോര്ട്ട്. കുട്ടിക്ക് ആന്റിവെനം നല്കാതെ സമയം നഷ്ടപ്പെടുത്തിയതാണ് കണ്ടെത്തല്. ഡോക്ടര്ക്കെതിരേ നടപടിയെടുക്കാന് അന്വേഷണ കമ്മിറ്റി ശിപാര്ശ ചെയ്തിട്ടും ആരോഗ്യവകുപ്പ് മൗനം തുടരുന്നുവെന്ന ആക്ഷേപമുണ്ട്. 2021 മെയ് 24നാണ് കൃഷ്ണന്കോട്ട പാറക്കല് ബിനോയുടെ മകള് അന്വറിന് ബിനോയ് എന്ന മൂന്നുവയസുകാരിയെ കളിച്ചുകൊണ്ടിരിക്കുമ്പോള് പാമ്പ് കടിച്ചത്. ഉടന്തന്നെ ബിനോയിയുടെ മാതാപിതാക്കള് കൊടുങ്ങല്ലൂര് താലൂക്ക് ആശുപത്രിയില് എത്തിച്ചു.
എന്നാല് കുട്ടിയെ നോക്കാതെ ഡോക്ടര് ആ സമയം മറ്റൊരു രോഗിയെ പരിശോധിക്കുകയായിരുന്നുവെന്നാണ് ബിനോയിയുടെ മാതാപിതാക്കളുടെ പരാതി. വിദേശത്തുള്ള ബിനോയിയെ വിളിച്ചു പറഞ്ഞ് ഫോണില് ഡോക്ടറോട് സംസാരിച്ചിട്ടും ഡോക്ടര് കുട്ടിയെ പരിഗണിച്ചില്ല. ക്യൂവില് നിര്ത്തി ചീട്ടെടുപ്പിച്ചു തുടങ്ങിയ ഗുരുതരമായ പരാതികളാണ് ആശുപത്രിക്കെതിരെ ഉണ്ടായിരുന്നത്.