ചാല മാർക്കറ്റിലെ ജ്വല്ലറിയിൽ പട്ടാപ്പകൽ മോഷണം

തിരുവനന്തപുരം: നഗരത്തിലെ ചാല മാർക്കറ്റിൽ പട്ടാപ്പകൽ മോഷണം. മാസ്ക് ധരിച്ചെത്തിയ യുവാവാണ് ജ്വല്ലറിയിൽനിന്ന് സ്വർണമോതിരവുമായി കടന്നത്. ഇന്ന് രാവിലെ 11നായിരുന്നു സംഭവം.

ബൈക്കിലെത്തിയ യുവാവ് സ്വർണാഭരണം വാങ്ങാനെന്ന വ്യാജേനയാണ് ജ്വല്ലറിക്കുള്ളിലേക്ക് കടന്നത്. തുടർന്ന് ഉടമയെ കബളിപ്പിച്ച് മോതിരം കൈക്കലാക്കി രക്ഷപ്പെടുകയായിരുന്നു. കടയുടമ ഇയാളെ തടയാൻ ശ്രമിച്ചെങ്കിലും മോഷ്ടാവ് ബൈക്കിൽ കയറി അതിവേഗത്തിൽ പോയി.

പോലിസ് സ്ഥലത്തെത്തി വിവരങ്ങൾ ശേഖരിച്ചു. ബൈക്കിന്റെ നമ്പർ പോലിസിന് ലഭിച്ചിട്ടുണ്ട്. മാസ്ക് ധരിച്ചതിനാൽ യുവാവിന്റെ മുഖം വ്യക്തമല്ല. അതിനാൽ ബൈക്കിന്റെ രജിസ്ട്രേഷൻ നമ്പർ കേന്ദ്രീകരിച്ചാണ് അന്വേഷണം.