കേന്ദ്ര ബജറ്റിലെ അവഗണനയില് കടുത്ത പ്രതിഷേധം, നാളെ സംസ്ഥാനത്ത് കരിദിനം ആചരിക്കാന് ആഹ്വാനം ചെയ്ത് സിപിഎം
തിരുവനന്തപുരം: കേന്ദ്ര ബജറ്റില് കേരളത്തെ പൂര്ണമായും അവഗണിച്ചതില് പ്രതിഷേധം കടുപ്പിക്കാന് സി പി എം തീരുമാനം. ബജറ്റിലെ അവഗണനയില് പ്രതിഷേധിച്ച് നാളെ സംസ്ഥാനവ്യാപകമായി കരിദിനം ആചരിക്കാന് സി പി എം തീരുമാനിച്ചു. ഇതിന്റെ ഭാഗമായി നാളെ എല്ലാ ബൂത്തുകളിലും കരിങ്കൊടി ഉയര്ത്തിയും പ്രതിഷേധ പ്രകടനങ്ങള് നടത്തിയും ജനകീയ പ്രതിഷേധം സംഘടിപ്പിക്കാനാണ് സി പി എം ആഹ്വാനം ചെയ്തിരിക്കുന്നത്. കേരളം ഇന്ത്യയുടെ ഭൂപടത്തില് പോലുമില്ലെന്ന തരത്തിലാണ് ധനമന്ത്രിയുടെ പ്രഖ്യാപനങ്ങളെന്നും, സംസ്ഥാനത്തിന്റെ ന്യായമായ ആവശ്യങ്ങളെ കേന്ദ്രം പൂര്ണ്ണമായും തള്ളിക്കളഞ്ഞുവെന്നും സി പി എം നേതൃത്വം കുറ്റപ്പെടുത്തി. നിര്മല സീതാരാമന് ബജറ്റ് അവതരിപ്പിച്ചതിന് പിന്നാലെ ഇന്നലെ തന്നെ മുഖ്യമന്ത്രി പിണറായിയും സി പി എം ജനറല് സെക്രട്ടറി എം എ ബേബിയും സംസ്ഥാന സെക്രട്ടറി എം വി ഗോവിന്ദനുമടക്കമുള്ളവര് രൂക്ഷ വിമര്ശനവുമായി രംഗത്തെത്തിയിരുന്നു.
കടലാമ മാത്രമല്ല കേരളത്തിലുള്ളതെന്ന് പറഞ്ഞ മുഖ്യമന്ത്രി പിണറായി വിജയന് കേന്ദ്ര ബജറ്റില് പ്രഖ്യാപിച്ച റെയര് എര്ത്ത് കോറിഡോര് ധാതുഖനനത്തില് സ്വകാര്യ മേഖലയെ സഹായിക്കാനുള്ള നീക്കമെന്ന് വിമര്ശിച്ചു. മറ്റ് സംസ്ഥാനങ്ങള്ക്കെല്ലാം എല്ലാം കിട്ടിയിട്ടും കേരളത്തെ മാത്രം അവഗണിച്ചു. എന്താണ് കേരളത്തിനുള്ള അയോഗ്യതയെന്ന ചോദ്യവും മുഖ്യമന്ത്രി ഉയര്ത്തി. ഇന്ത്യയുടെ ഭൂപടത്തില് കേരളം ഉണ്ടെന്ന് തന്നെ കേന്ദ്ര ധനമന്ത്രി മറന്നെന്ന വിമര്ശനവും പിണറായി ഉന്നയിച്ചു. കേരളത്തോടുള്ള ഇത്രയും വലിയ അവഗണനയില് കേരളത്തില് നിന്നുള്ള കേന്ദ്ര മന്ത്രിമാര് മറുപടി പറയണമെന്നും മുഖ്യമന്ത്രി ആവശ്യപ്പെട്ടു. സംസ്ഥാനം ദീര്ഘകാലമായി ആവശ്യപ്പെടുന്ന എയിംസ്, റെയില്വേ വികസനത്തിനായുള്ള ഏഴ് അതിവേഗ ഇടനാഴികള്, വിഴിഞ്ഞം തുറമുഖ വികസനത്തിനായുള്ള പ്രത്യേക പാക്കേജ് എന്നിവയെല്ലാം പൂര്ണ്ണമായും തഴയപ്പെട്ടെന്നും പിണറായി ചൂണ്ടിക്കാട്ടി. ഫിനാന്സ് കമ്മീഷന് വിഹിതം ഉയര്ത്തണമെന്ന ആവശ്യം നിരാകരിക്കുകയും 41 ശതമാനം വിഹിതമെന്ന നിലവിലെ സ്ഥിതി തുടരാന് തീരുമാനിക്കുകയും ചെയ്തത് ഫെഡറല് തത്വങ്ങളെ ദുര്ബലപ്പെടുത്തുന്ന നടപടിയാണെന്നും മുഖ്യമന്ത്രി കൂട്ടിച്ചേര്ത്തു.