സംസ്ഥാനത്ത് അഞ്ചുപേര്ക്ക് കൂടി സിക്ക വൈറസ് സ്ഥിരീകരിച്ചു; 16 പേരുടെ പരിശോധനാ ഫലം നെഗറ്റീവ്
തിരുവനന്തപുരം: സംസ്ഥാനത്ത് അഞ്ചുപേര്ക്ക് കൂടി സിക്ക വൈറസ് സ്ഥിരീകരിച്ചതായി ആരോഗ്യമന്ത്രി വീണാ ജോര്ജ് അറിയിച്ചു. ആലപ്പുഴ എന്ഐവിയില് നടത്തിയ പരിശോധനയിലാണ് ഇവര്ക്ക് സിക്ക വൈറസ് സ്ഥിരീകരിച്ചത്. ആനയറ സ്വദേശികളായ രണ്ടുപേര്ക്കും കുന്നുകുഴി, പട്ടം, കിഴക്കേകോട്ട എന്നിവിടങ്ങളിലെ ഒരാള്ക്ക് വീതവുമാണ് സിക്ക വൈറസ് സ്ഥിരീകരിച്ചത്.
ആനയറ സ്വദേശിനി (35), ആനയറ സ്വദേശിനി (29), കുന്നുകുഴി സ്വദേശിനി (38), പട്ടം സ്വദേശി (33), കിഴക്കേക്കോട്ട സ്വദേശിനി (44) എന്നിവര്ക്കാണ് സിക്ക വൈറസ് ബാധിച്ചത്. ഇതില് 4 പേരുടെ സാമ്പിളുകള് 2 സ്വകാര്യാശുപത്രികളില്നിന്നും അയച്ചതാണ്. ഒരെണ്ണം സര്വയലന്സിന്റെ ഭാഗമായി ആരോഗ്യവകുപ്പ് ശേഖരിച്ച സാംപിളാണ്. അതേസമയം 16 പേരുടെ പരിശോധനാഫലം നെഗറ്റീവായി. ഇതോടെ സംസ്ഥാനത്ത് ആകെ 28 പേര്ക്കാണ് സിക്ക വൈറസ് സ്ഥിരീകരിച്ചത്.