പാളത്തില് അറ്റകുറ്റപ്പണി: കേരളത്തില് ഇന്നും നാളെയും ട്രെയിന് ഗതാഗത നിയന്ത്രണം
തിരുവനന്തപുരം: മാവേലിക്കര ചെങ്ങന്നൂര് സെക്ഷനില് പാളത്തില് അറ്റകുറ്റപ്പണി നടക്കുന്നതിനാല് ഇന്നും നാളെയും ട്രെയിന് ഗതാഗത നിയന്ത്രണം ഏര്പ്പെടുത്തി. ഇന്ന് രാത്രി പുറപ്പെടേണ്ട കൊല്ലം ജങ്ഷന് എറണാകുളം ജങ്ഷന് എക്സ്പ്രസ് റദ്ദാക്കി. മധുര ഗുരുവായൂര് എക്സ്പ്രസ് കൊല്ലത്തും നാഗര്കോവില് കോട്ടയം എക്സ്പ്രസ് കായംകുളത്തും, ചെന്നൈ സെന്ട്രല് തിരുവനന്തപുരം സെന്ട്രല് സൂപ്പര്ഫാസ്റ്റ് കോട്ടയത്തും യാത്ര അവസാനിപ്പിക്കും. ഞായറാഴ്ചത്തെ ഗുരുവായൂര് മധുര എക്സ്പ്രസ് കൊല്ലത്തുനിന്നായിരിക്കും പുറപ്പെടുക.
തിരുവനന്തപുരം സെന്ട്രല് ചെന്നൈ സെന്ട്രല് സൂപ്പര്ഫാസ്റ്റ് ആലപ്പുഴ വഴി പോകും. ചേര്ത്തല, എറണാകുളം ജങ്ഷന് എന്നിവിടങ്ങളില് സ്റ്റോപ്പുണ്ടാകും. തിരുവനന്തപുരം നോര്ത്ത് ശ്രീ ഗംഗാനഗര് പ്രതിവാര എക്സ്പ്രസ്, തിരുവനന്തപുരം നോര്ത്ത് ലോക്മാന്യ തിലക് ടെര്മിനസ് പ്രതിവാര സ്പെഷ്യല്, തിരുവനന്തപുരം നോര്ത്ത് എസ് എം വി ടി ബംഗളൂരു ഹംസഫര് എക്സ്പ്രസ് എന്നിവയും ആലപ്പുഴ വഴി തിരിച്ചുവിടും. തിരുവനന്തപുരം സെന്ട്രല് എറണാകുളം വഞ്ചിനാട് എക്സ്പ്രസ്, കൊല്ലം ജങ്ഷന് എറണാകുളം ജങ്ഷന് മെമു എന്നിവ ഞായറാഴ്ച അര മണിക്കൂര് വൈകിയോടും. മറ്റ് നിരവധി ട്രെയിനുകളെയും ഗതാഗത നിയന്ത്രണം ബാധിക്കും എന്നതിനാല് റെയില് വണ് ആപ്പില് സമയം ഉറപ്പാക്കി മാത്രം യാത്ര പുറപ്പെടണമെന്ന് അറിയിപ്പുണ്ട്.