ഗുരുതര ആരോപണവുമായി ഉമ്മൻചാണ്ടി; സിപിഎമ്മിൻ്റെ ഭവന സന്ദർശനത്തിന് ചിലവഴിക്കുന്നത് സർക്കാർ ഫണ്ട്
സിപിഎമ്മിന്റെ ഭവനസന്ദര്‍ശനത്തിന് 'സുഭിക്ഷം ഭദ്രം സുരക്ഷിതം' എന്ന ലഘുലേഖയുടെ 75 ലക്ഷം കോപ്പികളാണ് സര്‍ക്കാര്‍ ചെലവില്‍ തയാറാകുന്നത്.
തിരുവനന്തപുരം: എൽഡിഎഫ് സർക്കാരിനെതിരേ ഗുരുതരമായ ആരോപണങ്ങളുമായി മുൻമുഖ്യമന്ത്രി ഉമ്മൻ ചാണ്ടി. കടുത്ത സാമ്പത്തിക ഞെരുക്കംമൂലം സര്‍ക്കാരിന്റെ നാലാം വാര്‍ഷികത്തിന് ആഘോഷമില്ലെന്ന് മുഖ്യമന്ത്രി ഒരു വശത്ത് പറയുമ്പോള്‍ മറുവശത്ത് നേട്ടങ്ങള്‍ വിവരിക്കുന്ന രണ്ടരക്കോടി രൂപയുടെ ലഘുലേഖ മൂന്നു പ്രസുകളില്‍ അച്ചടിക്കുന്നതായി ഉമ്മൻ ചാണ്ടി ആരോപിച്ചു.
സിപിഎമ്മിന്റെ ഭവനസന്ദര്‍ശനത്തിന് 'സുഭിക്ഷം ഭദ്രം സുരക്ഷിതം' എന്ന ലഘുലേഖയുടെ 75 ലക്ഷം കോപ്പികളാണ് സര്‍ക്കാര്‍ ചെലവില്‍ തയാറാകുന്നത്. സര്‍ക്കാര്‍ ക്വാറന്റീനില്‍ കഴിയുന്ന പ്രവാസികള്‍ ഇനി മുതല്‍ അതിന്റെ ചെലവ് വഹിക്കണമെന്നു പറയുന്ന സര്‍ക്കാരിന് ഇത്തരം ധൂര്‍ത്തുകള്‍ ഒഴിവാക്കാനാവില്ലേയെന്നും ഉമ്മൻചാണ്ടി ചോദിക്കുന്നു.
അഞ്ചുവര്‍ഷം കൊണ്ട് ചെയ്യേണ്ടവ നാലു വര്‍ഷംകൊണ്ട് ചെയ്‌തെന്നു മുഖ്യമന്ത്രി പറഞ്ഞപ്പോള്‍ തന്നെ കാര്യം വ്യക്തമായി- ഇനി ഒന്നും ഈ സര്‍ക്കാരില്‍ നിന്നു പ്രതീക്ഷിക്കേണ്ട. നാലുവര്‍ഷം കൈവരിച്ച നേട്ടങ്ങളുടെ പട്ടികയുമായി സിപിഎം സര്‍ക്കാര്‍ ചെലവില്‍ തെരഞ്ഞെടപ്പ് പ്രചാരണത്തിനു തുടക്കമിടുകയാണ്. പ്രകടനപത്രിയില്‍ പറഞ്ഞ കാര്യങ്ങള്‍ നടപ്പായില്ലെന്നു മാത്രമല്ല അവയ്ക്ക് കടകവിരുദ്ധമായ കാര്യങ്ങള്‍ നടപ്പാക്കുകയും ചെയ്തുവെന്നും ഉമ്മൻ ചാണ്ടി ചൂണ്ടിക്കാട്ടി.