യുഡിഎഫ് അവിശ്വാസ പ്രമേയം അമിത് ഷായുടെ നിർദേശപ്രകാരം: എസ് ശർമ
എൽഡിഎഫിന്‌ തുടർഭരണം ലഭിക്കുമെന്ന ഒരു ചാനൽ സർവ്വേ ഫലം പുറത്തുവന്നതു മുതൽ തുടങ്ങിയതാണ്‌ പ്രതിപക്ഷത്തിന് ഈ വെപ്രാളം.
തിരുവനന്തപുരം: ജനപിന്തുണ നഷ്‌ട‌പ്പെട്ട പ്രതിപക്ഷത്തിന് എങ്ങനെ എൽഡിഎഫ് സർക്കാരിനെതിരെ അവിശ്വാസം കൊണ്ട് വരാൻ കഴിയുമെന്ന് എസ് ശർമ്മ എംഎൽഎ. യുഡിഎഫ് അവിശ്വാസ പ്രമേയം ബിജെപി നേതാവും കേന്ദ്ര അഭ്യന്തര മന്ത്രിയുമായ അമിത് ഷായുടെ നിർദേശപ്രകാരമെന്നും അദ്ദേഹം പറഞ്ഞു. അവിശ്വാസ പ്രമേയത്തിൽമേൽ സംസാരിക്കുകയായിരുന്നു അദ്ദേഹം. ജനങ്ങളുടെ പിന്തുണ നേടിയെടുക്കാൻ കഴിയാത്ത പ്രതിപക്ഷമാണ്‌ കേരളത്തിലുള്ളത്‌. അതിന്‌ തെളിവാണ്‌ വട്ടിയൂർക്കാവ്‌, കോന്നി, പാലാ തുടങ്ങിയ യുഡിഎഫ് സീറ്റുകൾ ഉപതിരഞ്ഞെടുപ്പുകളിൽ എൽഡിഎഫിന്‌ വിജയിക്കാൻ കഴിഞ്ഞത്‌.
എൽഡിഎഫിന്‌ തുടർഭരണം ലഭിക്കുമെന്ന ഒരു ചാനൽ സർവ്വേ ഫലം പുറത്തുവന്നതു മുതൽ തുടങ്ങിയതാണ്‌ പ്രതിപക്ഷത്തിന് ഈ വെപ്രാളം. അമിത് ഷായുടെ തലയുടെ കഥ പറഞ്ഞ്‌ പ്രമേയം അവതരിപ്പിക്കേണ്ട കാര്യം ഉണ്ടോയെന്ന്‌ പ്രതിപക്ഷം ചിന്തിക്കണം. യുപിഎ സർക്കാർ ചെയ്‌തുകൂട്ടിയ അഴിമതികൾ കോൺഗ്രസ്‌ മറന്നുപോകരുത്‌. കൽക്കരി, ട്രക്ക്‌, ടു ജി സ്‌പെക്‌ട്രം വിഷയങ്ങൾ കേരളത്തിലെ ജനങ്ങൾ മറന്നുപോയിട്ടില്ല- ശർമ്മ പറഞ്ഞു.