തിരുവനന്തപുരം: ശംഖുമുഖത്ത് നാളെ (ഡിസംബര് 3 ബുധനാഴ്ച) ഇന്ത്യന് നാവികസേന സംഘടിപ്പിക്കുന്ന നേവല്ഡേ ഓപ്പറേഷന് ഡെമോയുമായി ബന്ധപ്പെട്ട് തിരുവനന്തപുരം നഗരത്തില് ഗതാഗത നിയന്ത്രണം. നാളെ ഉച്ചയ്ക്ക് 12 മണി മുതലാണ് ഗതാഗത ക്രമീകരണം ഏര്പ്പെടുത്തുക. വൈകുന്നേരം 4:30 മുതലാണ് നേവല് ഡേ ഡെമൊ സംഘടിപ്പിക്കുന്നത്.
ഡെമോ കാണുനായി 50000 ത്തിലധികം ജനങ്ങള് എത്തുമെന്നാണ് പ്രതീക്ഷിക്കുന്നത്. ഈ സാഹചര്യത്തില് നഗരത്തില് ഗതാഗത ക്രമീകരണങ്ങള് ഏര്പ്പെടുത്തിയിട്ടുണ്ട്. പൊതുജനങ്ങള്ക്ക് അനുവദിച്ച പാര്ക്കിംഗ് സ്ഥലങ്ങളില് മാത്രമേ പാര്ക്ക് ചെയ്യാന് പാടുള്ളൂ. അനധികൃതമായി പാര്ക്ക് ചെയ്യുന്ന വാഹനങ്ങള് നീക്കം ചെയ്ത് നിയമനടപടി സ്വീകരിക്കുന്നതാണ്. സിറ്റി പോലിസിന്റെ ഗതാഗത ക്രമീകരണങ്ങള് അറിയാന് 9497930055, 0471-255873 എ ന്നീ നമ്പറുകളില് ബന്ധപ്പെടാം.
ചാക്ക, കല്ലുംമൂട്, സ്റ്റേഷന്കടവ്, വലിയതുറ, കുമരിച്ചന്ത, മാധവപുരം എന്നീ ഭാഗങ്ങളില് നിന്നും ശംഖുംമുഖം, വെട്ടുകാട് ഭാഗത്തേക്ക് പാസ് അനുവദിച്ചിട്ടുള്ള വാഹനങ്ങള്ക്ക് മാത്രമെ പ്രവേശനം അനുവദിക്കൂ. വാഹനങ്ങളുടെ പാസ് പരിശോധിച്ച് പാര്ക്കിങ് ലഭ്യത അനുസരിച്ച് പ്രവേശനം അനുവദിക്കും.
പ്രത്യേക ക്ഷണിതാക്കളുടെയും മീഡിയയുടെയും വാഹനങ്ങള് പരിപാടി തുടങ്ങുന്നതിന് ഒരു മണിക്കൂര് മുമ്പ് വരെ ചാക്ക-ആല്സെയിന്റ്സ് വഴി ശംഖുമുഖത്ത് എത്തി ആളുകളെ ഇറക്കിയതിന് ശേഷം പാസിലെ ക്യുആര് കോഡില് രേഖപ്പെടുത്തിയിരിക്കുന്ന പാര്ക്കിങ് സ്ഥലങ്ങളില് പാര്ക്ക് ചെയ്യണം അതിനുശേഷം വരുന്ന വാഹനങ്ങള് ഈഞ്ചക്കല് - കല്ലുംമ്മൂട് - പൊന്നറപാലം - വലിയതുറ - ഡൊമസ്റ്റിക് എയര്പോര്ട്ട് വഴി പോകണം.
പാസ് അനുവദിക്കപ്പെട്ട കാണികളുടെ വാഹനങ്ങള് ചാക്ക-ആല് സെയിന്റ്സ്-ബാലനഗര് റോഡ് വഴിയും ചാക്ക-ആല്സെയിന്റ്സ്-മാധവപുരം-വേളി ടൂറിസ്റ്റ് വില്ലേജ്-വെട്ടുകാട് വഴിയും പാസില് അനുവദിക്കപ്പെട്ട പാര്ക്കിങ് സ്ഥലങ്ങളില് വാഹനങ്ങള് പാര്ക്ക് ചെയ്ത് നേവി ഏര്പ്പെടുത്തിയിട്ടുളള വാഹനങ്ങളില് കണ്ണാന്തുറ എത്തി പരിപാടി കാണുകയും പരിപാടി കഴിഞ്ഞതിന് ശേഷം നേവി ഏര്പ്പെടുത്തിയ വാഹനങ്ങളില് പാര്ക്കിങ് സ്ഥലങ്ങളിലേക്ക് തിരികെ പോവുകയും വേണം.
പാസ്സില്ലാതെ പരിപാടി കാണാന് വരുന്ന പൊതുജനങ്ങള്, വാഹനങ്ങള് തിരുവനന്തപുരം സിറ്റി പരിധിയില് വിവിധ ഭാഗങ്ങളില് ക്രമീകരിച്ചിട്ടുള്ള പാര്ക്കിങ് ഗ്രൗണ്ടുകളില് പാര്ക്ക് ചെയ്യേണ്ടതും, പാര്ക്കിങ് ഗ്രൗണ്ടുകളില് ഏര്പ്പെടുത്തിയിരിക്കുന്ന കെഎസ്ആര്ടിസി ബസുകളില് കയറി വെട്ടുകാട് ഇറങ്ങി പരിപാടി കണ്ടതിനുശേഷം വെട്ടുകാട് ഭാഗത്ത് ക്രമീകരിച്ചിരിക്കുന്ന കെഎസ്ആര്ടിസി ബസുകളില് കയറി അതാത് പാര്ക്കിങ് ഗ്രൗണ്ടുകളിലേക്ക് തിരികെ പോകേണ്ടതുമാണ്. ഉച്ചയ്ക്ക് ഒരു മണി മുതല് പാര്ക്കിങ് ഗ്രൗണ്ടുകളില് നിന്നും കെഎസ്ആര്ടിസി ബസുകള് നിശ്ചിത ടിക്കറ്റ് ചാര്ജ് ഈടാക്കി സര്വീസ് നടത്തും.
പാര്ക്കിങ് ഗ്രൗണ്ടുകള്
കൊല്ലം, ആറ്റിങ്ങല്, പോത്തന്കോട്, ശ്രീകാര്യം ഭാഗങ്ങളില് നിന്നും വരുന്നവര് ഗ്രീന്ഫീല്ഡ് സ്റ്റേഡിയം ഗ്രൗണ്ടിലും, കാര്യവട്ടം യൂണിവേഴ്സിറ്റി കോളേജ് പാര്ക്കിങ് ഗ്രൗണ്ടിലും വാഹനങ്ങള് പാര്ക്ക് ചെയ്യേണ്ടതാണ്.
എംസി റോഡ് വഴി വരുന്നവര് വാഹനങ്ങള് എംജി കോളേജ് ഗ്രൗണ്ടില് പാര്ക്ക് ചെയ്യേണ്ടതാണ്. നെടുമങ്ങാട്, പേരൂര്ക്കട, ശാസ്തമംഗലം ഭാഗങ്ങളില് നിന്നും വരുന്നവര് കവടിയാറിലുള്ള സാല്വേഷന് ആര്മി ഗ്രൗണ്ടിലും, സംസ്കൃത കോളേജ് യൂണിവേഴ്സിറ്റി കോളേജ്, യൂണിവേഴ്സിറ്റി ക്യാമ്പസ്, എല്എംഎസ് പാര്ക്കിങ് ഗ്രൗണ്ടുകളിലും പാര്ക്ക് ചെയ്യണം.
കാട്ടാക്കട, തിരുമല ഭാഗങ്ങളില് നിന്നും വരുന്നവര് വാഹനങ്ങള് പൂജപ്പുര ഗ്രൗണ്ടിലും, വെള്ളയമ്പലത്തുള്ള ജിമ്മി ജോര്ജ് ഗ്രൗണ്ടിലും, വാട്ടര് അതോറിറ്റി പാര്ക്കിങ് കോമ്പൗണ്ടിലും പാര്ക്ക് ചെയ്യേണ്ടതാണ്.
പാറശ്ശാല, നെയ്യാറ്റിന്കര, പാപ്പനംകോട്, കരമന ഭാഗങ്ങളില് നിന്നും വരുന്നവര് കിള്ളിപ്പാലം ബോയ്സ് ഹൈസ്കൂളിലും, ആറ്റുകാല് പാര്ക്കിങ് ഗ്രൗണ്ടിലും ഐരാണിമുട്ടത്തുള്ള ഹോമിയോ കോളേജ് പാര്ക്കിങ് ഗ്രൗണ്ടുകളിലും, പുത്തരികണ്ടം മൈതാനത്തും വാഹനങ്ങള് പാര്ക്ക് ചെയ്യേണ്ടതാണ്.
കോവളം, പൂന്തുറ, തിരുവല്ലം, പേട്ട, ചാക്ക, ഈഞ്ചക്കല് ഭാഗങ്ങളില് നിന്നും വരുന്നവര് ലുലുമാള്, ആനയറ വേള്ഡ് മാര്ക്കറ്റ്, കരിക്കകം ക്ഷേത്രം പാര്ക്കിങ് ഗ്രൗണ്ടുകളില് വാഹനങ്ങള് പാര്ക്ക് ചെയ്യേണ്ടതാണ്.
വര്ക്കല, കടയ്കാവൂര്, പെരുമാതുറ ഭാഗങ്ങളില് നിന്നും തീരദേശ റോഡ് വഴി വരുന്നവര് വാഹനങ്ങള് പുത്തന്തോപ്പ് പള്ളി ഗ്രൗണ്ടിലും, സെന്റ് സേവ്യയേഴ്സ് കോളേജ് പാര്ക്കിങ് ഏരിയയിലും പാര്ക്ക് ചെയ്യേണ്ടതാണ്.
ഡൊമസ്റ്റിക് എയര്പോര്ട്ടിലേക്കുള്ള യാത്രക്കാര് വെണ്പാലവട്ടം, ചാക്ക ഫ്ളൈ ഓവര്, ഈഞ്ചക്കല് കല്ലുംമൂട്, പൊന്നറ പാലം, വലിയതുറ വഴി എയര്പോര്ട്ടില് എത്തിച്ചേരേണ്ടതും സുലൈമാന് തെരുവ്, വള്ളക്കടവ്, ഈഞ്ചക്കല് വഴി തിരികെ പോകേണ്ടതാണ്. ഇന്റര്നാഷണല് എയര്പോര്ട്ടിലേയ്ക്ക് വരുന്ന വാഹനങ്ങള് ചാക്ക അനന്തപുരി ഹോസ്പിറ്റല്- സര്വീസ് റോഡ് വഴി പോകണം.
പാര്ക്കിങ് ഗ്രൗണ്ടുകളില് നിന്നുള്ള കെഎസ്ആര്ടിസി റൂട്ട്
ഗ്രീന്ഫീല്ഡ് സ്റ്റേഡിയം ഗ്രൗണ്ട്, കാര്യവട്ടം യൂണിവേഴ്സിറ്റി കോളേജ്, യൂണിവേഴ്സിറ്റി ക്യാമ്പസ്, എല്എംഎസ് പാര്ക്കിങ് ഗ്രൗണ്ടുകള് എന്നിവിടങ്ങളില് നിന്നും പൂജപ്പുര-ജഗതി-വിമന്സ് കോളേജ് ജംഗ്ഷന്-വഴുതക്കാട്-വെള്ളയമ്പലം-മ്യൂസിയം-വിജെറ്റി-ആശാന്സ്ക്വയര്-പേട്ട-ചാക്ക-ആള്സെയിന്റ്സ് കോളേജ് മാധവപുരം-വേളി ടൂറിസ്റ്റ് വില്ലേജ് വഴി വെട്ടുകാട് ഭാഗത്തേക്കും പരിപാടി കഴിഞ്ഞതിന് ശേഷം പാര്ക്കിങ് ഗ്രൗണ്ടുകളില് തിരികെ കെഎസ്ആര്ടിസി ബസുകളില് എത്തിക്കുന്നതാണ്.
ഹോമിയോ കോളേജ്, ആറ്റുകാല് ക്ഷേത്ര പാര്ക്കിങ് ഗ്രൗണ്ട്, കിള്ളിപ്പാലം സ്കൂള്, പുത്തരികണ്ടം എന്നീ പാര്ക്കിങ് ഗ്രൗണ്ടുകളില് നിന്നും ഹോമിയോ കോളേജ്, ആറ്റുകാല് ക്ഷേത്ര പാര്ക്കിങ് ഗ്രൗണ്ട്, കിള്ളിപ്പാലം സ്കൂള് എന്നീ സ്ഥലങ്ങളില് നിന്നും കിഴക്കേകോട്ട വഴി സ്റ്റാച്യു-ആശാന് സ്ക്വയര്-പേട്ട-ചാക്ക-ആള്സെയിന്റ്സ് കോളേജ് മാധവപുരം-വേളി ടൂറിസ്റ്റ് വില്ലേജ് വഴി വെട്ടുകാട് ഭാഗത്തേക്കും പരിപാടി കഴിഞ്ഞതിന് ശേഷം പാര്ക്കിങ് ഗ്രൗണ്ടുകളില് തിരികെ കെഎസ്ആര്ടിസി ബസുകളില് എത്തിക്കുന്നതാണ്.
പൂജപ്പര ഗ്രൗണ്ട്, വെള്ളയമ്പലം വാട്ടര് അതോറിറ്റി കോമ്പൗണ്ട്, ജിമ്മി ജോര്ജ് ഇന്ഡോര് സ്റ്റേഡിയം, സംസ്കൃത കോളേജ്, യൂണിവേഴ്സിറ്റി കോളേജ്, യൂണിവേഴ്സിറ്റി ക്യാമ്പസ്, എല്.എം.എസ് പാര്ക്കിങ് ഗ്രൗണ്ടുകള് എന്നീ പാര്ക്കിങ് ഗ്രൗണ്ടുകളില് നിന്നും പൂജപ്പുര-ജഗതി-വിമന്സ് കോളേജ് ജംഗ്ഷന്-വഴുതക്കാട്-വെള്ളയമ്പലം-മ്യൂസിയം-വിജെറ്റി-ആശാന്സ്ക്വയര്-പേട്ട-ചാക്ക-ആള്സെയിന്റ്സ് കോളേജ് മാധവപുരം-വേളി ടൂറിസ്റ്റ് വില്ലേജ് വഴി വെട്ടുകാട് ഭാഗത്തേക്കും പരിപാടി കഴിഞ്ഞതിന് ശേഷം പാര്ക്കിങ് ഗ്രൗണ്ടുകളില് തിരികെ കെഎസ്ആര്ടിസി ബസുകളില് എത്തിക്കുന്നതാണ്.
എംജി കോളേജ് പാര്ക്കിങ് ഗ്രൗണ്ടില് നിന്നും കേശവദാസപുരം-പട്ടം-പിഎംജി-പാളയം- ആശാന്സ്ക്വയര്-പേട്ട-ചാക്ക-ആള്സെയിന്റ്സ് കോളേജ് -മാധവപുരം-വേളി ടൂറിസ്റ്റ് വില്ലേജ് വഴി വെട്ടുകാട് ഭാഗത്തേക്കും പരിപാടി കഴിഞ്ഞതിന് ശേഷം പാര്ക്കിങ് ഗ്രൗണ്ടിലേക്ക് തിരികെ കെഎസ്ആര്ടിസി ബസുകളില് എത്തിക്കുന്നതാണ്.
ലുലുമാള്, ആനയറ വേള്ഡ് മാര്ക്കറ്റ്, കരിക്കകം ക്ഷേത്ര പാര്ക്കിംഗ് എന്നീ പാര്ക്കിംഗ് ഗ്രൗണ്ടുകളില് നിന്നും വെണ്പാലവട്ടം-കൊച്ചുവേളി റെയില്വെ സ്റ്റേഷന്-മാധവപുരം-വേളി ടൂറിസ്റ്റ് വില്ലേജ് വഴിയും വെണ്പാലവട്ടം-ചാക്ക-ആള്സെയിന്റ്സ് കോളേജ് -മാധവപുരം-വേളി ടൂറിസ്റ്റ് വില്ലേജ് വഴിയും വെട്ടുകാട് ഭാഗത്തേക്കും പരിപാടി കഴിഞ്ഞതിന് ശേഷം പാര്ക്കിങ് ഗ്രൗണ്ടുകളില് തിരികെ കെഎസ്ആര്ടിസി ബസുകളില് എത്തിക്കുന്നതാണ്.
പുത്തന്തോപ്പ്, സെന്റ് സേവ്യയേഴ്സ് കോളേജ് പാര്ക്കിംഗ്, തുമ്പ വിഎസ്എസ്സി ഗ്രൗണ്ട് എന്നീ പാര്ക്കിങ് ഗ്രൗണ്ടുകളില് നിന്നും പുത്തന്തോപ്പ്-ആറാട്ടുവഴി-പള്ളിത്തുറ-സ്റ്റേഷന്കടവ്-സൗത്ത് തുമ്പ മാധവപുരം-വേളി ടൂറിസ്റ്റ് വില്ലേജ് വഴി വെട്ടുകാട് ഭാഗത്തേക്കും പരിപാടി കഴിഞ്ഞതിന് ശേഷം പാര്ക്കിങ് ഗ്രൗണ്ടുകളില് തിരികെ കെഎസ്ആര്ടിസി ബസുകളില് എത്തിക്കുന്നതാണ്.