നിലമ്പൂരില് പി വി അന്വറിനെ തൃണമൂല് സ്ഥാനാര്ഥിയായി ഔദ്യോഗികമായി പ്രഖ്യാപിച്ച് മമത
കൊല്ക്കത്ത: നിലമ്പൂര് ഉപതിരഞ്ഞെടുപ്പില് മല്സരിക്കുന്നതിന് തൃണമൂല് കോണ്ഗ്രസ് സ്ഥാനാര്ഥിയായി പി വി അന്വറിനെ ഔദ്യോഗികമായി പ്രഖ്യാപിച്ചു. തൃണമൂല് കോണ്ഗ്രസ് അധ്യക്ഷയും പശ്ചിമ ബംഗാള് മുഖ്യമന്ത്രിയുമായ മമതാ ബാനര്ജിയുടെ ആശീര്വാദത്തോടെയാണ് അന്വര് സ്ഥാനാര്ഥിയാകുന്നതെന്ന് പാര്ട്ടി ദേശീയ നേതൃത്വം വാര്ത്താകുറിപ്പില് അറിയിച്ചു.
നിലമ്പൂരില് മല്സരിക്കുമെന്ന് ഞായറാഴ്ച രാവിലെ പത്രസമ്മേളനം നടത്തി അന്വര് പ്രഖ്യാപിച്ചിരുന്നു. മത്സരിക്കാനില്ലെന്ന കഴിഞ്ഞ ദിവസത്തെ നിലപാടില്നിന്ന് മലക്കം മറിഞ്ഞുകൊണ്ടായിരുന്നു അന്വറിന്റെ പ്രഖ്യാപനം. തിങ്കളാഴ്ച നാമനിര്ദേശ പത്രിക സമര്പ്പിക്കുമെന്നും അന്വര് അറിയിച്ചിട്ടുണ്ട്.
താന് മല്സരിച്ചാല് മമതാ ബാനര്ജിയും പത്ത് മന്ത്രിമാരും പ്രചാരണത്തിനെത്തുമെന്ന് നേരത്തെ അന്വര് വ്യക്തമാക്കിയിരുന്നു. തൃണമൂല് കോണ്ഗ്രസ് ഔദ്യോഗികമായി സ്ഥാനാര്ഥിത്വം പ്രഖ്യാപിച്ചതോടെ അന്വര് പാര്ട്ടി ചിഹ്നത്തിലാകും മല്സരിക്കുക എന്ന കാര്യം ഉറപ്പായിരിക്കുകയാണ്.