പൊതുപ്രവര്‍ത്തകന് നേരേ ലഹരി മാഫിയയുടെ ആക്രമണം
പൊതുപ്രവര്‍ത്തകനായ ഷാനവാസിന് നേരെയാണ് കഴിഞ്ഞദിവസം ലഹരി മാഫിയയുടെ ആക്രമണമുണ്ടായത്.
കൊച്ചി: കടുങ്ങല്ലൂര്‍ പഞ്ചായത്തിലെ ഏലൂക്കരയില്‍ പൊതുപ്രവര്‍ത്തകന് നേരേ ലഹരി മാഫിയയുടെ ആക്രമണം. പൊതുപ്രവര്‍ത്തകനായ ഷാനവാസിന് നേരെയാണ് കഴിഞ്ഞദിവസം ലഹരി മാഫിയയുടെ ആക്രമണമുണ്ടായത്. നാട്ടിലെ യുവജനങ്ങളെ ലഹരിക്ക് അടിമപ്പെടുത്തുന്ന മാഫിയക്കെതിരേ ജനങ്ങളെ സംഘടിപ്പിക്കുകയും പോലിസില്‍ അടക്കം പരാതി നല്‍കുകയും ചെയ്തതിന്റെ പ്രതികാരമായാണ് ആക്രമണം നടത്തിയതെന്ന് ഷാനവാസ് പറയുന്നു.
ഗുരുതരമായ പരിക്കേറ്റ ഷാനവാസിനെ ആലുവയിലെ സ്വകാര്യാശുപത്രിയില്‍ പ്രവേശിപ്പിച്ചിരിക്കുകയാണ്. കടുങ്ങല്ലൂര്‍ പഞ്ചായത്തിന്റെ വിവിധ പ്രദേശങ്ങളില്‍ തെരുവുവിളക്കുകള്‍ കത്താത്തത് ലഹരിമാഫിയ വളരുന്നതിന് കാരണമായിട്ടുണ്ട്. ലഹരി മാഫിയകളെ നിയമത്തിനു മുന്നില്‍ കൊണ്ടുവരണമെന്നും ഷാനവാസിനെ മര്‍ദിച്ചവരെ അറസ്റ്റുചെയ്യണമെന്നും ആവശ്യപ്പെട്ട് ബഹുജനപ്രക്ഷോഭം തുടങ്ങാനിരിക്കുകയാണ് നാട്ടുകാര്‍.