കേരളത്തിലെ ഒരു യുവ രാഷ്ട്രീയ നേതാവില് നിന്നും മോശം അനുഭവം ഉണ്ടായി: യുവനടി റിനി ജോര്ജ്
കൊച്ചി: കേരളത്തിലെ ഒരു യുവ രാഷ്ട്രീയ നേതാവില് നിന്നും മോശം അനുഭവം ഉണ്ടായെന്ന് സിനിമാ നടി റിനി ആന് ജോര്ജ്. അശ്ലീല സന്ദേശങ്ങളയച്ചെന്നും മോശം സമീപനം ഉണ്ടായെന്നും അറിയിച്ചിട്ടും അയാള്ക്ക് സ്ഥാനമാനങ്ങള് നല്കുകയാണെന്നും റിനി പറഞ്ഞു. ഗിന്നസ് പക്രു നായകനായി അടുത്തിടെ തയേറ്ററുകളിലെത്തിയ 916 കുഞ്ഞൂട്ടന് എന്ന ചിത്രത്തിലെ താരമാണ് റിനി. സിനിമാ മേഖലയില് നിന്ന് ചിലര് മോശമായി അപ്രോച്ച് സമീപിക്കുന്നുണ്ട്. രാഷ്ട്രീയത്തിലും ഇതേ പ്രശ്നമുണ്ട്. നേതാവ് അശ്ലീല സന്ദേശം അയക്കുകയും ഹോട്ടലിലേക്ക് വരാന് നിര്ബന്ധിച്ചെന്നും നടി വെളിപ്പെടുത്തി.
നേതാവിന്റെ പേര് വെളിപ്പെടുത്താന് ആഗ്രഹിക്കുന്നില്ലെന്നും ആ വ്യക്തി ഉള്പ്പെട്ട പ്രസ്ഥാനത്തിലുള്ള പലരുമായും നല്ല ബന്ധമാണെന്നും റിനി ആന് ജോര്ജ് പറഞ്ഞു. സോഷ്യല് മീഡിയ വഴിയാണ് ഇയാളുമായി പരിചയമുള്ളത്. തുടക്കം മുതല് മോശം മെസേജുകള് അയച്ചു. ഇത് ശരിയല്ലെന്ന് പറഞ്ഞിട്ടും അയാള് അത് തുടര്ന്നു. മൂന്നര വര്ഷം മുന്പാണ് ആദ്യമായി മെസേജ് അയച്ചത്. അതിനുശേഷമാണ് അയാള് ജനപ്രതിനിധിയായത്. അയാള് കാരണം മറ്റു ബുദ്ധിമുട്ടുകള് ഇല്ലാത്തത് കൊണ്ടാണ് പരാതിയുമായി മുന്നോട്ട് പോകാത്തത്. പരാതിയുള്ളവര് അതുമായി മുന്നോട്ടു പോകട്ടെയെന്നും റിനി ആന് ജോര്ജ് പറഞ്ഞു.
ഇയാളെ പറ്റി പാര്ട്ടിയിലെ പല നേതാക്കളോടും പറഞ്ഞിരുന്നു. നേതൃത്വത്തോട് പരാതിപ്പെടുമെന്ന് പറഞ്ഞപ്പോള് പോയി പറയുവെന്നായിരുന്നു മറുപടി. ഇത്തരത്തിലുള്ള ആളുകളെ ഇനിയും സ്ഥാനങ്ങളില് എത്തിക്കരുതെന്ന് മാത്രം പറയുകയാണെന്നും റിനി ആന് ജോര്ജ് പറഞ്ഞു.