കൊച്ചി: ഭാര്യയെ കത്തികൊണ്ട് കുത്തിയ ശേഷം ഭര്ത്താവ് കഴുത്തറത്ത് ആത്മഹത്യക്കു ശ്രമിച്ചു. മഞ്ഞുമ്മല് പള്ളിക്കുസമീപം ബുധനാഴ്ച വൈകീട്ടോടെയാണ് സംഭവം. ഭര്ത്താവായ ഹാരീസാണ് ഭാര്യ ഫസീനയെ ആക്രമിച്ചത്. ഫസീനയുടെ കൈക്കാണ് കുത്തേറ്റത്. പിന്നീട് ഹാരിസ് സ്വയം കഴുത്തറക്കുകയായിരുന്നു.
മഞ്ഞുമ്മലിലെ സ്വകാര്യ ആശുപത്രിയില് പ്രവേശിപ്പിച്ച ഫസീനയുടെ പരിക്ക് ഗുരുതരമല്ല. അതേസമയം, ഹാരിസ് അതീവ ഗുരുതരാവസ്ഥയില് കളമശ്ശേരി മെഡിക്കല് കോളേജില് ചികിത്സയിലാണ്. കുടുംബ വഴക്കാണ് ആക്രമണത്തിലേക്ക് നയിച്ചത് എന്നാണ് വിവരം.
ഏറെ നാളായി ക്യാന്സര് രോഗിയാണ് ഹാരീസ്. ചികിത്സയിലായിരുന്നതിനാല് ജോലിക്കും പോകാന് സാധിച്ചിരുന്നില്ല. ഫസീന ചെറിയ ജോലികള് ചെയ്താണ് കുടുംബം പുലര്ത്തിയിരുന്നത്. നാട്ടുകാരുടെ സഹായവും ലഭിച്ചിരുന്നു. മഞ്ഞുമ്മലിലെ വാടക വീട്ടില് താമസിച്ചിരുന്ന ഇരുവരും തമ്മില് വഴക്കുകള് പതിവാണെന്നാണ് വാര്ഡ് കൗണ്സിലര് അടക്കം പറയുന്നത്.