ഹിജാബ് വിലക്ക്; 'വെല്ലുവിളി ഇങ്ങോട്ട് വേണ്ട'- സ്കൂള് മാനേജ്മെന്റിനെതിരേ മന്ത്രി വി ശിവന്കുട്ടി
രാഷ്ട്രീയവല്ക്കരിക്കാന് ആസൂത്രിത ശ്രമം
തിരുവനന്തപുരം: പള്ളുരുത്തി സെയ്ന്റ് റീത്താസ് പബ്ലിക് സ്കൂളിലെ ഹിജാബ് വിവാദത്തില് സ്കൂള് മാനേജ്മെന്റിനെതിരെ കടുത്ത വിമര്ശനവുമായി വിദ്യാഭ്യാസ മന്ത്രി വി ശിവന്കുട്ടി. പ്രശ്ന പരിഹാരത്തിന് ശേഷവും സ്കൂള് അധികൃതര് വാര്ത്താസമ്മേളനം നടത്തി മന്ത്രിയേയും സര്ക്കാരിനേയും വിമര്ശിക്കുന്നതിനു പിന്നില് രാഷ്ട്രീയ താത്പര്യമാണെന്ന് മന്ത്രി ആരോപിച്ചു.
പ്രശ്നത്തിന് പരിഹാരം കാണുന്നതിനേക്കാള് സര്ക്കാരിനെ വിമര്ശിക്കാനായിരുന്നു സ്കൂള് മാനേജ്മെന്റിന്റെ ലക്ഷ്യം. പ്രത്യേക അജണ്ടയുടെ ഭാഗമായിട്ടാണ് ഇതെല്ലാം നടക്കുന്നതെന്ന് സംശയിക്കുന്നു. കോണ്ഗ്രസിന് വേണ്ടിയോ മറ്റാര്ക്കെങ്കിലും വേണ്ടിയോ രാഷ്ട്രീയപരവും വര്ഗീയപരവുമായ വിവേചനം കേരളത്തിന്റെ വിദ്യാഭ്യാസ മേഖലയില് സൃഷ്ടിക്കാന് ആര് ശ്രമിച്ചാലും അത് സര്ക്കാര് അനുവദിക്കില്ല.
വിദ്യാലയങ്ങളെ കക്ഷിരാഷ്ട്രീയത്തിന്റെ വേദിയാക്കാന് ആരേയും അനുവദിക്കില്ല. ഒരവസരം കിട്ടിയതുകൊണ്ട് പിടിഎ പ്രസിഡന്റും പ്രിന്സിപ്പലും മാനേജറും ഇത്രയധികം മോശമായി സര്ക്കാരിനേയും അതിന്റെ സംവിധാനത്തേയും പരസ്യമായി വിമര്ശിക്കാന് പാടുണ്ടോയെന്നും മന്ത്രി ചോദിച്ചു. വലിയ ആഹ്ലാദത്തോടെയാണ് അവര് വിമര്ശനം നടത്തിയത്. എന്നിട്ട് സര്ക്കാരിനെ വെല്ലുവിളിക്കുന്നു. ആ വെല്ലുവിളി വേണ്ട. നിയമം നിയമത്തിന്റെ വഴിക്ക് പോകും. നിയമവിരുദ്ധമായ കാര്യങ്ങള് ആരുടെ ഭാഗത്ത് നിന്നുണ്ടായാലും അതിലിടപെടാനുള്ള അധികാരം പൊതുവിദ്യാഭ്യാസ വകുപ്പിനുണ്ടെന്നും മന്ത്രി പറഞ്ഞു.
'സ്കൂള് അധികൃതരുടെ ഭാഗത്തുനിന്നും അവരുടെ അഭിഭാഷകയുടെ ഭാഗത്തുനിന്നും ഉണ്ടായ അപക്വമായ പരാമര്ശങ്ങള് പ്രശ്നത്തെ കൂടുതല് വഷളാക്കാനേ ഉപകരിക്കൂ. അതൊരു വിദ്യാഭ്യാസ സ്ഥാപനത്തിന് യോജിച്ചതല്ല. സര്ക്കാര് വിശദീകരണം ചോദിച്ചാല് മറുപടി പറയേണ്ടത് പിടിഎ പ്രസിഡന്റും അഭിഭാഷകയുമല്ലെന്ന് മാനേജ്മെന്റിന് ഓര്മ വേണം. വിദ്യാര്ഥികളുടെ പഠനാന്തരീക്ഷം സുരക്ഷിതമാക്കുക എന്നതാണ് പ്രഥമ പരിഗണന. സര്ക്കാര് വിഷയത്തില് നിയമപരമായി ചെയ്യാന് കഴിയുന്ന എല്ലാ കാര്യങ്ങളും ചെയ്യും'മന്ത്രി പറഞ്ഞു.
പ്രശ്നം തീര്ന്നതിനു ശേഷം സര്ക്കാരിനെയും മന്ത്രിയേയും ഒരടിസ്ഥാനവുമില്ലാതെ വിമര്ശിക്കുന്നത് രാഷ്ട്രീയ മുതലെടുപ്പിനു വേണ്ടിയാണ്. എന്ത് അധികാരമാണെന്നൊക്കെ ചോദിച്ചു. അങ്ങനെയൊന്നും കേരളത്തിലെ ഒരു മാനേജ്മെന്റും ഇതുവരെ ചോദിച്ചിട്ടില്ല. സര്ക്കാരിന് മുകളിലാണ് ഞങ്ങളെന്ന ഭാവമുണ്ടെങ്കില് അത് അംഗീകരിക്കില്ലെന്നും മന്ത്രി വ്യക്തമാക്കി.
Full View