ന്യൂഡല്‍ഹി: ആഭ്യന്തര കലഹം രൂക്ഷമായതിനെ തുടര്‍ന്ന് ലിബിയന്‍ തലസ്ഥാനമായ ട്രിപ്പോളിയില്‍ നിന്ന് ഇന്ത്യന്‍ പൗരന്‍മാര്‍ ഉടന്‍ പിന്‍വാങ്ങണമെന്ന് കേന്ദ്ര വിദേശകാര്യ മന്ത്രി സുഷമാ സ്വരാജ് അറിയിച്ചു. നിങ്ങളുടെ ബന്ധുക്കളോടും സുഹൃത്തുക്കളോടും ഉടന്‍ ട്രിപ്പോളി വിടാന്‍ ആവശ്യപ്പെടുക. അവരെ പിന്നീട് ഒഴിപ്പിക്കാന്‍ ഞങ്ങള്‍ക്കാവില്ലെന്നാണ് സുഷമാ സ്വരാജ് ട്വിറ്ററില്‍ കുറിച്ചത്.
ലിബിയന്‍ തലസ്ഥാന നഗരമായ ട്രിപ്പോളിയുടെ നിയന്ത്രണം ഏറ്റെടുക്കാന്‍ വിമത ഗ്രൂപ്പുകള്‍ ശ്രമിക്കുന്നത് കഴിഞ്ഞ രണ്ട് ആഴ്ചയായി വ്യാപക സംഘര്‍ഷത്തിനിടയാക്കിയിട്ടുണ്ട്. 500ഓളം ഇന്ത്യന്‍ പൗരന്‍മാര്‍ ട്രിപ്പോളിയിലുണ്ടെന്നാണു റിപോര്‍ട്ട്. ട്രിപ്പോളി കൂടുതല്‍ സംഘര്‍ഷഭരിതമായ അന്തരീക്ഷത്തിലേക്ക് അതിവേഗം നീങ്ങുകയാണെന്നും നിലവില്‍ വിമാന സര്‍വീസുകള്‍ നടത്തുന്നുണ്ടെന്നും സുഷമാ സ്വരാജ് അറിയിപ്പില്‍ വ്യക്തമാക്കി. രണ്ടാഴ്ചയ്ക്കിടെ 200ഓളം പേരാണ് ലിബിയയില്‍ കൊല്ലപ്പെട്ടത്.