ബിജെപി സർക്കാരുകൾ 'ലൗ ജിഹാദ്' നിയമം നടപ്പിലാക്കുമ്പോൾ മിശ്ര വിവാഹങ്ങൾക്ക് ധനസഹായവുമായി ഉത്തരാഖണ്ഡ് സർക്കാർ

ഡെറാഡൂൺ: വിവാഹത്തിന്റെ പേരിൽ സ്ത്രീകളെ മതപരിവർത്തനം നടത്തുന്നുവെന്നാരോപിച്ച് നിയമം നടപ്പാക്കാൻ ആലോചിക്കുന്ന ബിജെപി ഭരിക്കുന്ന നിരവധി സംസ്ഥാനങ്ങൾക്കിടയിൽ, ഇത്തരം മിശ്ര വിവാഹങ്ങളെ പ്രോത്സാഹിപ്പിക്കുന്നതിനായി ഉത്തരാഖണ്ഡ് സർക്കാർ ധനസഹായം പ്രഖ്യാപിച്ചു.

നിയമപരമായി രജിസ്റ്റർ ചെയ്ത എല്ലാ മിശ്രവിവാഹിതർക്കും 50000 രൂപ നൽകുമെന്ന് സംസ്ഥാന സാമൂഹ്യക്ഷേമ വകുപ്പ് ഉദ്യോഗസ്ഥർ പറഞ്ഞു. ബിജെപിയുടെ ലൗ ജിഹാദ് ആരോപണത്തിന് തിരിച്ചടിയാണ് ബിജെപി തന്നെ ഭരിക്കുന്ന ഉത്തരാഖണ്ഡ് സർക്കാർ നടപടി.

ജാതിരഹിത വിവാഹങ്ങളിൽ, ഭരണഘടനയുടെ ആർട്ടിക്കിൾ 341 പ്രകാരം നിർവചിച്ചിരിക്കുന്ന പ്രകാരം ഇണകളിലൊരാൾ പട്ടികജാതിയിൽ നിന്നുള്ളവരായിരിക്കണം എന്നതാണ് സാമ്പത്തിക ആനുകൂല്യങ്ങൾ ലഭിക്കുന്നതിനുള്ള ഒരു വ്യവസ്ഥ. ജാതിരഹിത, മതരഹിത വിവാഹങ്ങൾക്ക് നൽകുന്ന സാമ്പത്തിക സഹായം ദേശീയ ഐക്യത്തിന്റെ ചൈതന്യം വളർത്തുന്നതിന് വളരെയധികം സഹായകമാകുമെന്ന് സാമൂഹ്യക്ഷേമ ഓഫീസർ ദിപങ്കർ ഗിൽഡിയാൽ പറഞ്ഞു.

യോഗ്യതയുള്ള ദമ്പതികൾക്ക് വിവാഹം കഴിഞ്ഞ് ഒരു വർഷം വരെ സാമ്പത്തിക സഹായത്തിനായി അപേക്ഷിക്കാം. അത്തരം ദമ്പതികൾക്ക് സംയുക്തമായി നൽകുന്ന തുക 2014 ൽ ഉത്തരാഖണ്ഡിൽ 10,000 രൂപയിൽ നിന്ന് 50,000 രൂപയായി ഉയർത്തി.