ന്യൂഡല്ഹി: സ്പാം കോളുകള്, മെസ്സേജുകള് എന്നിവ സൃഷ്ട്ടിക്കുന്ന പ്രശ്നങ്ങള്ക്ക് വിരാമമിടാന് ഒരുങ്ങി ട്രായ്. നടപടികളുടെ ഭാഗമായി കഴിഞ്ഞ ഒരു വര്ഷത്തിനിടെ ട്രായ് 2.1 ദശലക്ഷം മൊബൈല് നമ്പറുകള് നിരോധിക്കുകയും വ്യാജ എസ്എംഎസുകളും കോളുകളും തുടര്ച്ചയായി അയച്ച ഒരു ലക്ഷത്തോളം സ്ഥാപനങ്ങളെ കരിമ്പട്ടികയില്പ്പെടുത്തുകയും ചെയ്തു. ആദ്യമായാണ് ഇത്രയും നമ്പര് ഒരുമിച്ച് നിരോധിക്കുന്നത്.
മൊബൈല് ഉപയോക്താക്കള്ക്ക് സ്പാം കോളുകളും സന്ദേശങ്ങളും ലഭിക്കുകയാണെങ്കില് അവ ബ്ലോക്ക് ചെയ്യുക മാത്രമല്ല മറിച്ച് അവ റിപ്പോര്ട്ട് ചെയ്യുകയും വേണമെന്ന് ട്രായ് നിര്ദ്ദേശിച്ചു. ഇതിനായി ട്രായ് ഡി.എന്.ഡി. (TRAI DND) ആപ്പ് ഉപയോഗിക്കാനായും ട്രായ് അഭ്യര്ത്ഥിച്ചു . സ്പാം കോളുകളും സന്ദേശങ്ങളും റിപ്പോര്ട്ട് ചെയ്യാന് സാധിക്കുന്ന ട്രായിയുടെ ആപ്പാണിത്. ഈ ആപ്പ് ഉപയോഗിച്ച ആളുകള് റിപ്പോര്ട്ട് ചെയ്ത നമ്പറുകളാണ് ട്രായ് നിരോധിച്ചത്.
സ്പാമില് നിന്ന് രക്ഷനേടാന് ഉപയോക്താക്കള്ക്കായി ട്രായ് പുറത്തിറക്കിയ മാര്ഗ്ഗനിര്ദ്ദേശങ്ങള്
ഉപയോക്താക്കള് ഫോണില് ട്രായ് ഡി.എന്.ഡി ആപ്പ് ഇന്സ്റ്റാള് ചെയ്യുക.
സ്പാം സന്ദേശങ്ങളോ കോളുകളോ ലഭിക്കുകയാണെങ്കില് അവ ആപ്പ് വഴി റിപ്പോര്ട്ട് ചെയ്യുക.
ഫോണ് കോളുകളിലൂടെയോ സന്ദേശങ്ങളിലൂടെയോ വ്യക്തിഗതമോ ബാങ്കിംഗ് സംബന്ധമായതോ ആയ വിവരങ്ങള് പങ്കുവെക്കരുത്.
ഏതെങ്കിലും കോളുകളിലോ സന്ദേശങ്ങളിലോ സംശയം തോന്നുന്നുണ്ടെങ്കില് ഉടന് തന്നെ കോള് വിച്ഛേദിക്കുക.
സൈബര് തട്ടിപ്പുകള് ശ്രദ്ധയില്പ്പെട്ടാല് ദേശീയ സൈബര് ക്രൈം ഹെല്പ്പ് ലൈന് ആയ 1930-ല് റിപ്പോര്ട്ട് ചെയ്യുക. ഇതിനായി സര്ക്കാര് പോര്ട്ടലും(www.cybercrime.gov.in)ഉപയോഗിക്കാവുന്നതാണ്.