തിരുപ്പൂരില് കാര് അപകടത്തില് മൂന്ന് മലയാളികള് മരിച്ചു; ഒരാള്ക്ക് പരിക്ക്
തിരുപ്പൂര്: തിരുപ്പൂര് കാങ്കയത്തിനടുത്ത് കാര് നിയന്ത്രണം വിട്ട് വഴിയരികിലെ മരത്തിലിടിച്ചതില് മൂന്ന് ഇടുക്കി സ്വദേശികള് മരിക്കുകയും ഒരാള്ക്ക് പരിക്കേല്ക്കുകയും ചെയ്തു. ഇടുക്കി മുന്നാറിലെ ഗൂഡര് വിള എസ്റ്റേറ്റ് പ്രദേശത്തെ സി.രാജ എന്ന നിക്സന്(46), ഭാര്യ ജാനകി (40), മകള് ഹേമ നേത്ര (15) എന്നിവരാണ് കൊല്ലപ്പെട്ടത്. മറ്റൊരു മകള് മൗന സെറിനിനെ (11) പരിക്കുകളോടെ കോയമ്പത്തൂര് മെഡിക്കല് കോളേജ് ആശുപത്രിയില് പ്രവേശിപ്പിച്ചു.
ഈറോഡ് ജില്ലയിലെ അരസലൂര് പ്രാഥമികാരോഗ്യ കേന്ദ്രത്തിലെ നഴ്സാണ് ജാനകി. ഏതാനും ദിവസത്തെ അവധിക്കുശേഷം മുന്നാറില് നിന്നും അരസലൂരിലേക്കു പോകുമ്പോള് ചൊവാഴ്ച രാവിലെ ഒന്പതുമണിയോടെ നത്തക്കടയൂരിലെ സുന്ദരപുരിയില് വച്ചായിരുന്നു അപകടം.