നടന് ദിലീപിന്റെ ഹരജി സുപ്രിംകോടതി ഇന്നു പരിഗണിക്കും
വേനലവധിക്ക് ശേഷം പരിഗണിക്കാമെന്ന് ജസ്റ്റിസ് എ എം ഖാന്വില്ക്കര് അധ്യക്ഷനായ ബെഞ്ച് പറഞ്ഞെങ്കിലും സംസ്ഥാന സര്ക്കാര് എതിര്ത്തു.
ന്യൂഡല്ഹി: നടി ആക്രമിക്കപ്പെട്ട കേസില് മുഖ്യ തെളിവായ മെമ്മറി കാര്ഡിന്റെ പകര്പ്പ് ആവശ്യപ്പെട്ട് നടന് ദിലീപ് സമര്പ്പിച്ച ഹര്ജി സുപ്രിംകോടതി ഇന്ന് പരിഗണിക്കും. വേനലവധിക്ക് ശേഷം പരിഗണിക്കാമെന്ന് ജസ്റ്റിസ് എ എം ഖാന്വില്ക്കര് അധ്യക്ഷനായ ബെഞ്ച് പറഞ്ഞെങ്കിലും സംസ്ഥാന സര്ക്കാര് എതിര്ത്തു. സുപ്രിംകോടതിയിലെ ഹരജി തീര്പ്പായാല് മാത്രമേ ദിലീപിന് കുറ്റപത്രം കൈമാറാന് കഴിയുകയുളളൂവെന്ന് സര്ക്കാര് നിലപാടെടുത്തു. മെമ്മറി കാര്ഡ് രേഖയാണെന്നും പ്രതിയെന്ന നിലയില് പകര്പ്പ് ലഭിക്കാന് തനിക്ക് അര്ഹതയുണ്ടെന്നുമാണ് ദിലീപിന്റെ വാദം.
കേസിലെ എല്ലാ രേഖകളും ലഭിക്കാന് തനിക്ക് അവകാശമുണ്ടെന്നും ദിലീപിന്റെ ഹരജിയില് പറയുന്നു. ദിലീപിന് വേണ്ടി മുന് അറ്റോര്ണി ജനറല് മുകുള് റോത്തഗിയുടെ ജൂനിയര് രഞ്ജീത റോത്തഗി ആണ് ഹരജി ഫയല് ചെയ്തിരിക്കുന്നത്. ദിലീപിന്റെ ആവശ്യം നേരത്തെ വിചാരണ കോടതിയും ഹൈക്കോടതിയും തള്ളിയിരുന്നു. ഇരയുടെ സ്വകാര്യത ഹനിക്കുന്നതാണ് ദിലീപിന്റെ ആവശ്യമെന്ന് കാണിച്ചാണ് ഹര്ജി തള്ളിയത്.