നിമിഷപ്രിയയുടെ മോചനത്തിനായി സ്വന്തമായി ഒരു പണവും വാങ്ങിയിട്ടില്ല'; തലാലിന്റെ സഹോദരന്റെ ആരോപണം തള്ളി സാമുവല് ജെറോം
ന്യൂഡല്ഹി: നിമിഷപ്രിയ കേസില് കൊല്ലപ്പെട്ട തലാലിന്റെ സഹോദരന് അബ്ദുല് ഫത്താഹ് മഹ്ദിയുടെ ആരോപണങ്ങളില് പ്രതികരിച്ച് സാമുവല് ജെറോം. നിമിഷപ്രിയയുടെ മോചനത്തിനായി സ്വന്തമായി ഒരു പണവും വാങ്ങിയിട്ടില്ലെന്ന് സാമുവല് ജെറോം പറഞ്ഞു. മീറ്റിംഗുകള്ക്ക് തെളിവുകള് ഉണ്ടെന്നും ഇപ്പോള് പ്രതികരിച്ച് അദ്ദേഹത്തെ പ്രകോപിപ്പിക്കുന്നില്ലെന്നും സാമുവല് ജെറോം കൂട്ടിച്ചേര്ത്തു.
ചര്ച്ചകള് നടക്കുകയാണെന്നും അഭിഭാഷകനെന്ന് താന് അവകാശപ്പെട്ടിട്ടില്ലെന്നുമാണ് സാമുവല് ജെറോം പറയുന്നത്. അതേസമയം സാമുവല് ജെറോം മധ്യസ്ഥത എന്ന പേരില് പണം പിരിക്കുന്നുവെന്നും നിമിഷപ്രിയയുടെ മോചന വിഷയത്തില് സാമുവല് ജെറോം വര്ഷങ്ങളായി തങ്ങളുമായി ബന്ധപ്പെട്ടിട്ടില്ലെന്നുമായിരുന്നു അബ്ദുല് ഫത്താഹ് മഹ്ദി ഫേസ്ബുക്ക് കുറിപ്പില് പറഞ്ഞിരുന്നത്. അറബിയിലുള്ള കുറിപ്പ് മലയാളത്തിലും ഇംഗ്ലീഷിലും തര്ജ്ജമ ചെയ്താണ് ഫേസ്ബുക്കില് പങ്കുവച്ചിരിക്കുന്നത്.
സാമുവല് ജെറോം തങ്ങളുമായി കൂടിക്കാഴ്ച നടത്തുകയോ കാണുകയോ ബന്ധപ്പെടുകയോ ഒരു മെസേജ് പോലും അയയ്ക്കുകയോ ചെയ്തിട്ടില്ലെന്നും, മറിച്ചാണെങ്കില് അത് തെളിയിക്കാന് വെല്ലുവിളിക്കുന്നതായും അദ്ദേഹം ഫേസ്ബുക്കില് കുറിച്ചു. വധശിക്ഷക്ക് പ്രസിഡന്റ് അംഗീകാരം നല്കിയതിന് പിന്നാലെ താന് അദ്ദേഹത്തെ സനായില് വെച്ച് കണ്ടുമുട്ടിയെന്നും അന്ന് സന്തോഷത്തോടെ സാമുവല് ജെറോം ഒരായിരം അഭിനന്ദനങ്ങള് എന്ന് പറഞ്ഞതായും ഫേസ്ബുക്ക് കുറിപ്പില് വ്യക്തമാക്കുന്നു.
പിന്നീട് മണിക്കൂറുകള്ക്ക് ശേഷം കേരള മാധ്യമങ്ങള് പരിശോധിച്ചപ്പോഴാണ് മോചനത്തിനുള്ള പണമായി സാമുവല് ജെറോം 20,000 ഡോളര് ശേഖരിക്കാന് അഭ്യര്ത്ഥിച്ച വിവരം അറിഞ്ഞതെന്നും വര്ഷങ്ങളായി ഇയാള് തങ്ങളുടെ ചിന്തിയ രക്തം മധ്യസ്ഥത എന്ന പേരില് വ്യാപാരം നടത്തുകയാണെന്നും അബ്ദുല് ഫത്താഹ് മഹ്ദി ഫേസ്ബുക്കില് കുറിച്ചു. തങ്ങള്ക്ക് സത്യം അറിയാമെന്നും അദ്ദേഹം നുണ പറയുന്നതും വഞ്ചനയും അവസാനിപ്പിച്ചില്ലെങ്കില് സത്യം വെളിപ്പെടുത്തുമെന്നും പറഞ്ഞാണ് കുറിപ്പ് അവസാനിപ്പിക്കുന്നത്.