ശ്രീനഗര്‍: ജമ്മു കശ്മീരിലെ പുല്‍വാമയില്‍ പോലിസുകാരന് നേരേ സായുധര്‍ വെടിയുതിര്‍ത്തു.ജമ്മു കശ്മീര്‍ പോലിസിലെ മുഷ്താഖ് അഹമ്മദ് വാഗേയ്ക്ക് നേരെയാണ് ആക്രമണമുണ്ടായത്. ഞായറാഴ്ച രാത്രിയില്‍ ബുണ്ട്‌സൂവിലെ അദ്ദേഹത്തിന്റെ വസതിക്ക് സമീപമായിരുന്നു സംഭവം. പരിക്കേറ്റ അഹമ്മദിനെ ബോണ്‍ ആന്റ് ജോയിന്റ് ആശുപത്രിയിലേക്ക് മാറ്റി.
പ്രദേശത്ത് സുരക്ഷാ സേന തിരച്ചില്‍ തുടങ്ങി. ഏതാനും ദിവസങ്ങളായി പുല്‍വാമയില്‍ സായുധരുടെ ആക്രമണം നടക്കുകയാണ്. ഒരു സായുധനെ സൈന്യം വധിക്കുകയും ചെയ്തു. രാജ്പുര മേഖലയിലും സായുധരും സുരക്ഷാസേനയും തമ്മില്‍ ഏറ്റുമുട്ടി. കഴിഞ്ഞദിവസമാണ് ശ്രീനഗറില്‍ പോലിസ് ബസ്സിന് നേരേ സായുധാക്രമണമുണ്ടായത്. ഇതില്‍ മൂന്ന് പോലിസുകാര്‍ കൊല്ലപ്പെട്ടിരുന്നു. പാര്‍ലമെന്റ് ആക്രമണത്തിന്റെ വാര്‍ഷിക ദിനത്തിലായിരുന്നു ശ്രീനഗറില്‍ പോലിസ് ബസ്സിന് നേരേ സായുധര്‍ വെടിയുതിര്‍ത്തത്.