പൂഞ്ചില് പാക്ക് ഷെല്ലാക്രമണം; സൈനികന് കൊല്ലപ്പെട്ടു; ജമ്മു കശ്മീരിലെ അതിര്ത്തി പ്രദേശങ്ങളിലുള്ളവരെ മാറ്റാന് നിര്ദേശം
ശ്രീനഗര്: പൂഞ്ചില് പാക്ക് ഷെല്ലാക്രമണത്തില് സൈനികന് കൊല്ലപ്പെട്ടു. ലാന്സ് നായിക് ദിനേശ് കുമാറാണ് വീരമൃത്യു വരിച്ചത്. പാകിസ്താന് നടത്തിയ ഷെല്ലാക്രമണത്തിനു പിന്നാലെ ജമ്മു കശ്മീരിലെ അതിര്ത്തി പ്രദേശങ്ങളില് താമസിക്കുന്നവരെ സുരക്ഷിത സ്ഥാനങ്ങളിലേക്ക് മാറ്റാന് നിര്ദേശം. ജനങ്ങളെ സുരക്ഷിത സ്ഥാനങ്ങളിലേക്ക് മാറ്റണമെന്ന് ലഫ്.ഗവര്ണര് മനോജ് സിന്ഹ ഡെപ്യൂട്ടി കമ്മിഷണര്മാര്ക്ക് നിര്ദേശം നല്കി.
ഷെല്ലാക്രമണത്തിന്റെ പശ്ചാത്തലത്തില് ജമ്മു കശ്മീര് മുഖ്യമന്ത്രി ഒമര് അബ്ദുല്ല എല്ലാ ജില്ലകളിലെയും ഡെപ്യൂട്ടി കമ്മിഷണര്മാരുമായി വിഡിയോ കോണ്ഫറന്സിങ്ങിലൂടെ അടിയന്തര യോഗം ചേര്ന്നു. അതിര്ത്തി ജില്ലകള്ക്ക് 5 കോടി രൂപ വീതവും മറ്റു ജില്ലകള്ക്ക് 2 കോടി രൂപയും അടിയന്തരമായി അനുവദിക്കാന് അദ്ദേഹം നിര്ദേശം നല്കി. അതിര്ത്തി പ്രദേശങ്ങളില് ജനങ്ങള്ക്കായി കൂടുതല് ഷെല്ട്ടറുകളും ബങ്കറുകളും ഒരുക്കണമെന്നും ആവശ്യത്തിനുള്ള ഭക്ഷ്യവസ്തുക്കള് കരുതണമെന്നും അദ്ദേഹം യോഗത്തില് പറഞ്ഞു.