നിമിഷപ്രിയയുടെ മോചനം; കൊല്ലപ്പെട്ട യമന് പൗരന്റെ കുടുംബം ചര്ച്ചകളോട് സഹകരിച്ച് തുടങ്ങിയതായി റിപോര്ട്ട്
സന: യമനില് വധശിക്ഷക്ക് വിധിക്കപ്പെട്ട മലയാളി നഴ്സ് നിമിഷപ്രിയയുടെ മോചനം സംബന്ധിച്ച ചര്ച്ചകളില് കൊല്ലപ്പെട്ട യമന് പൗരന് തലാലിന്റെ കുടുംബം ചര്ച്ചകളോട് സഹകരിച്ചുതുടങ്ങിയെന്ന് റിപോര്ട്ട്. നിമിഷപ്രിയയുടെ മോചനത്തില് ശുഭപ്രതീക്ഷയെന്നാണ് സൂചന. ഗ്രാന്റ് മുഫ്തി കാന്തപുരം എപി അബൂബക്കര് മുസ് ലിയാരുടെ ഇടപെടലിനെ തുടര്ന്ന് സൂഫി പണ്ഡിതരാണ് കുടുംബത്തോട് സംസാരിച്ചത്.
കൊല്ലപ്പെട്ട തലാലിന്റെ കുടുംബത്തിലെ വലിയൊരു വിഭാഗവും ചര്ച്ചകളോടും നിര്ദേശങ്ങളോടും സഹകരിക്കുന്നുവെന്നാണ് വിവരം. കുടുംബത്തിന്റെ ഏകീകരണം ഉറപ്പുവരുത്താനാണ് ശ്രമങ്ങള് നടക്കുന്നത്. എന്നാല് കുടുംബത്തിലെ യുവാക്കളുടെ ചെറിയ വിഭാഗം ഇപ്പോഴും നിമിഷപ്രിയക്ക് വധശിക്ഷ കിട്ടണമെന്ന നിലപാടില് ഉറച്ച് നില്ക്കുകയാണ്. തലാലിന്റെ കുടുംബം മോചനദ്രവ്യം സ്വീകരിച്ച് നിമിഷപ്രിയയ്ക്ക് മാപ്പുകൊടുക്കാന് തയ്യാറായാല് മാത്രമേ വധശിക്ഷ ഒഴിവാകുകയുള്ളൂ.