മല്സരത്തിനിടെ ഗുസ്തിതാരം കുഴഞ്ഞുവീണ് മരിച്ചു
കൗമാരക്കാരനായ സോനു ചന്ദ്രവാന്ഷിയാണ് (19) മരിച്ചത്.
ഭോപാല്: മധ്യപ്രദേശിലെ ശിവാനിയില് മല്സരത്തിനിടെ ഗുസ്തിതാരം കുഴഞ്ഞുവീണ് മരിച്ചു. കൗമാരക്കാരനായ സോനു ചന്ദ്രവാന്ഷിയാണ് (19) മരിച്ചത്. കഴിഞ്ഞ ദിവസം രാത്രിയായിരുന്നു സംഭവം. മല്സരത്തിനിടെ കുഴഞ്ഞുവീണ സോനുവിനെ ഉടന് ജില്ലാ ആശുപത്രിയിലെത്തിച്ചെങ്കിലും രക്ഷിക്കാനായില്ല. പോസ്റ്റ്മോര്ട്ടത്തിനുശേഷം മൃതദേഹം ബന്ധുക്കള്ക്ക് വിട്ടുകൊടുത്തു.
ഹൃദയാഘാതമാണ് മരണകാരണമെന്ന് പോസ്റ്റ്മോര്ട്ടം റിപോര്ട്ടില് പറയുന്നു. സംഭവത്തില് പോലിസ് കേസ് രജിസ്റ്റര് ചെയ്ത് അന്വേഷണം ആരംഭിച്ചു. സംഘാടകരുടെ ഭാഗത്തുനിന്ന് എന്തെങ്കിലും വീഴ്ചയുണ്ടായിട്ടുണ്ടോയെന്നും പോലിസ് അന്വേഷിക്കുന്നുണ്ട്. പുറത്തേറ്റ ശക്തമായ ഇടിക്കുപിന്നാലെയാണ് സോനു കുഴഞ്ഞുവീണതെന്ന് നാട്ടുകാര് പറയുന്നു.