അപകടം വര്‍ധിക്കാന്‍ കാരണം മികച്ച റോഡുകള്‍; വിചിത്രവാദവുമായി കര്‍ണാടക ഉപമുഖ്യമന്ത്രി
ബെംഗളൂരു: അപകടങ്ങള്‍ വര്‍ധിക്കാന്‍ കാരണം നല്ല റോഡുകളാണെന്നു കര്‍ണാടക ഉപമുഖ്യമന്ത്രി ഗോവിന്ദ് കജ്‌റോള്‍. കര്‍ണാടകയിലെ ചിത്രദുര്‍ഗയില്‍ മാധ്യമപ്രവര്‍ത്തകരോടു സംസാരിക്കവേയാണ് വിചിത്രവാദവുമായി ഉപമുഖ്യമന്ത്രി തന്നെ രംഗത്തെത്തിയത്. റോഡ് മോശമാണെങ്കില്‍ അപകടം സംഭവിക്കില്ല. മികച്ചതും സുരക്ഷിതവുമായ റോഡുകള്‍ കാരണമാണ് അപകടങ്ങളുണ്ടാവുന്നത്. റോഡുകള്‍ മികച്ച നിലവാരത്തിലായതിനാലാണ് അപകടനിരക്ക് കൂടുന്നത്. റോഡുകളില്‍ ഇപ്പോള്‍ മണിക്കൂറില്‍ നൂറു കിലോമീറ്ററിലേറെ വേഗതയില്‍ വാഹനമോടിക്കാനാവും. അതിനാല്‍ തന്നെയാണ് അപകടങ്ങളുടെ എണ്ണവും കൂടുന്നതെന്നും അദ്ദേഹം പറഞ്ഞു.