എച്ച് ഡി രേവണ്ണക്ക് ജാമ്യം അനുവദിച്ച പ്രത്യേക കോടതി വിധിയില് പിഴവുണ്ടെന്ന് കര്ണാടക ഹൈക്കോടതി
ബെംഗളൂരു: ലൈംഗികാതിക്രമക്കേസില് ജെ.ഡി.എസ് നേതാവ് എച്ച്.ഡി. രേവണ്ണക്ക് ജാമ്യം അനുവദിച്ച ബെംഗളൂരുവിലെ പ്രത്യേക കോടതിയുടെ വിധിയില് പിഴവുണ്ടെന്ന് കര്ണാടക ഹൈക്കോടതി. രേവണ്ണയുടെ ജാമ്യം റദ്ദാക്കണമെന്ന് ആവശ്യപ്പെട്ട് പ്രത്യേക അന്വേഷണ സംഘം സമര്പ്പിച്ച ഹരജി പരിഗണിക്കവെയാണ് ഹൈക്കോടതിയുടെ പരാമര്ശം.
ജസ്റ്റിസ് കൃഷ്ണ. എസ്. ദീക്ഷിതിന്റെതാണ് നിരീക്ഷണം. ഹരജി പരിഗണിക്കവെ രേവണ്ണക്ക് ജാമ്യം നല്കിയതില് കോടതിക്ക് പിഴവ് പറ്റിയെന്ന് പ്രഥമദൃഷ്ട്യാ വ്യക്തമാണെന്ന് ഹൈക്കോടതി പറഞ്ഞു.
മെയ് 13നാണ് ബെംഗളൂരുവിലെ പ്രത്യേക കോടതി രേവണ്ണക്ക് ജാമ്യം നല്കിയത്. ലൈംഗികാതിക്രമം നേരിട്ട ഇരയെ തട്ടിക്കൊണ്ട് പോയെന്ന കേസിലായിരുന്നു രേവണ്ണക്ക് ജനപ്രതിനിധികള്ക്കായുള്ള പ്രത്യേക കോടതി ജാമ്യം നല്കിയത്. രേവണ്ണക്ക് ഹൈക്കോടതി നോട്ടീസ് അയക്കുകയും ചെയ്തിട്ടുണ്ട്. തനിക്കെതിരെ രജിസ്റ്റര് ചെയ്ത കേസ് റദ്ദാക്കണമെന്ന് ആവശ്യപ്പെട്ട് രേവണ്ണ നല്കിയ ഹരജിയില് സംസ്ഥാന സര്ക്കാരിനും കോടതി നോട്ടീസ് അയച്ചു.
രണ്ട് ആള്ജാമ്യത്തോടൊപ്പം അഞ്ച് ലക്ഷം രൂപക്ക് വ്യക്തിഗത ബോണ്ട് നല്കുകയും അന്വേഷണ സംഘത്തോട് പൂര്ണമായും സഹകരിക്കാമെന്ന ഉറപ്പിന്മേലുമാണ് എച്ച് .ഡി. രേവണ്ണക്ക് ജാമ്യം അനുവദിച്ചത്.