ലഹരിമരുന്ന് കേസ്: ദീപികയും സാറാ അലിഖാനും അടക്കം 4 പേരെ ചോദ്യം ചെയ്യാൻ വിളിപ്പിച്ചു
സെപ്തംബര് 25-ന് ചോദ്യം ചെയ്യലിന് ഹാജരാകാന് ആവശ്യപ്പെട്ടാണ് സമന്സ് അയച്ചിരിക്കുന്നത്.
മുംബൈ: സുശാന്ത് സിങ് രജ്പുതിന്റെ മരണവുമായി ബന്ധപ്പെട്ട മയക്കുമരുന്ന് കേസില് ബോളിവുഡ് താരം ദീപിക പദുക്കോൺ, സാറാ അലിഖാന്, ശ്രദ്ധ കപൂര്, രാകുല് പ്രീത് എന്നിവരെ ചോദ്യം ചെയ്യാൻ വിളിപ്പിച്ചു. ഹാജരാകാന് ആവശ്യപ്പെട്ട് നാര്ക്കോട്ടിക്സ് കണ്ട്രോള് ബ്യൂറോയാണ് സമന്സ് അയച്ചത്.
സെപ്തംബര് 25-ന് ചോദ്യം ചെയ്യലിന് ഹാജരാകാന് ആവശ്യപ്പെട്ടാണ് സമന്സ് അയച്ചിരിക്കുന്നത്. ലഹരിമരുന്ന് കേസില് ആദ്യമായാണ് ബോളിവുഡിലെ ഒന്നാംനിര താരങ്ങളെ ചോദ്യം ചെയ്യലിനായി വിളിപ്പിക്കുന്നത്. ഈ കേസില് ജുഡീഷ്യല് കസ്റ്റഡിയിലുളള റിയ ചക്രവര്ത്തിയില് നിന്നാണ് ദീപിക പദുക്കോണുമായി ബന്ധപ്പെട്ട ചില വിവരങ്ങള് ലഭിച്ചതെന്നാണ് റിപോർട്ട്.
റിയയുടെ ടാലന്റ് മാനേജരായ ജയ സാഹയില് നിന്ന് അന്വേഷണ സംഘം മൊബൈല് ഫോണ് പിടിച്ചെടുത്തിരുന്നു. ആ ഫോണിലെ ചാറ്റില് ദീപികയുടെ ടാലന്റ് മാനേജരായിരുന്ന കരീഷ്മയോട് ദീപിക ലഹരിമരുന്ന് ആവശ്യപ്പെടുന്നതായി സൂചനയുളള ചില ചാറ്റുകള് അന്വേഷണ സംഘത്തിന് ലഭിച്ചിരുന്നുവെന്നാണ് പുറത്തുവരുന്ന റിപോർട്ടുകൾ. അതിന്റെ അടിസ്ഥാനത്തിലാണ് ദീപികയോട് ചോദ്യം ചെയ്യലിനായി ഹാജരാകാന് ആവശ്യപ്പെട്ടിട്ടുളളത്.