ദ്വാരകയിൽ പശുവിന്റെ മൃതദേഹാവശിഷ്ടം കണ്ടെത്തി; അജ്ഞാതർക്കെതിരേ കേസ്

ന്യൂഡൽഹി: ദ്വാരകയിൽ പശുവിന്റെ മൃതദേഹാവശിഷ്ടം കണ്ടെത്തിയതിനെ തുടർന്ന് അജ്ഞാതർക്കെതിരേ കേസ് രജിസ്റ്റർ ചെയ്തു. ദ്വാരക സെക്ടർ -23 ലെ അഴുക്കുചാലിലാണ് പശുവിന്റെ മൃതദേഹാവശിഷ്ടങ്ങൾ കണ്ടെത്തിയത്. ശവങ്ങൾ നീക്കം ചെയ്തതായും തുടർന്ന് അജ്ഞാതർക്കെതിരേ കേസ് രജിസ്റ്റർ ചെയ്തതായും പോലിസ് അറിയിച്ചു.

ദ്വാരക സെക്ടർ -23 ലെ ആളൊഴിഞ്ഞ സ്ഥലത്ത് അഴുക്ക് ചാലിൽ പശുവിന്റെ മൃതദേഹാവശിഷ്ടങ്ങൾ കണ്ടെത്തിയതായി തിങ്കളാഴ്ച ഉച്ചയ്ക്കാണ് വിവരം ലഭിച്ചത്. തുടർന്നാണ് പോലിസ് നടപടിയെടുത്തതെന്ന് മുതിർന്ന പോലിസ് ഉദ്യോഗസ്ഥൻ പറഞ്ഞു.

അജ്ഞാത വ്യക്തികൾക്കെതിരെ പ്രസക്തമായ വകുപ്പുകൾ പ്രകാരം ഞങ്ങൾ കേസ് രജിസ്റ്റർ ചെയ്തിട്ടുണ്ട്, കൂടുതൽ അന്വേഷണം അനുസരിച്ച് ഉചിതമായ നടപടി സ്വീകരിക്കുമെന്ന് അദ്ദേഹം പറഞ്ഞു. ഇത് പശു കശാപ്പ് കേസാണെന്നാണ് പോലിസ് സംശയിക്കുന്നത്. ബിജെപി എംപി പർവേഷ് സാഹിബ് സിങ്ങും തന്റെ മണ്ഡലത്തിന് കീഴിലുള്ള സംഭവസ്ഥലം സന്ദർശിച്ചു. സംഭവത്തിൽ ഉൾപ്പെട്ട കുറ്റവാളികൾക്കെതിരേ കർശന നടപടി സ്വീകരിക്കണമെന്ന് ആവശ്യപ്പെട്ടു.