ബം​ഗാളിൽ ബിജെപി പ്രസിഡന്റിനെതിരേ കല്ലേറും കരിങ്കൊടിയും

കൊൽക്കത്ത: പാർട്ടി പരിപാടികളിൽ പങ്കെടുക്കാൻ എത്തിയ ബിജെപി ബം​ഗാൾ സംസ്ഥാന പ്രസിഡന്റ് ദിലീപ് ഘോഷിനെതിരേ വ്യാപക പ്രതിഷേധം. ബംഗാളിലെ അലിപൂർദുർ ജില്ലയിലെ ജെയ്‌ഗാവ് പ്രദേശത്താണ് ദിലീപ് ഘോഷിന്റെ വാഹനവ്യൂഹത്തിന് നേരേ കല്ലേറും കരിങ്കൊടി പ്രയോ​ഗവും നടന്നത്.

ഗൂർഖ ജൻമുക്തി മോർച്ച പ്രവർത്തകരുടെ നേതൃത്വത്തിലാണ് അക്രമം നടന്നത്. ദിലീപ് ഘോഷ് ​ഗോ ബാക്ക് എന്ന മുദ്രാവാക്യം മുഴക്കിയാണ് പ്രവർത്തകർ കല്ലെറിയുകയും കരിങ്കൊടി കാണിക്കുകയും ചെയ്തത്. ആക്രമണത്തിൽ ഘോഷിന്റെ വാഹനം ഭാഗികമായി തകർന്നതായി ബിജെപി വൃത്തങ്ങൾ അറിയിച്ചു.

അതേസമയം, പോലിസ് ഉദ്യോഗസ്ഥരുടെ സംഘം സ്ഥിതിഗതികൾ നിയന്ത്രണ വിധേയമാക്കുകയായിരുന്നു. വരാനിരിക്കുന്ന നിയമസഭാ തിരഞ്ഞെടുപ്പിൽ തോൽവി അറിഞ്ഞു തുടങ്ങിയതിനാൽ തൃണമൂലും അവരുടെ സുഹൃത്തുക്കളും നിരാശരാണെന്ന് ഘോഷ് പിന്നീട് മാധ്യമപ്രവർത്തകരോട് പറഞ്ഞു.