'വിഷന് 2031' സെമിനാറുകള്ക്ക് തുടക്കം; കേരളത്തിന്റെ ഭാവി വികസനം ലക്ഷ്യമിട്ട് വിവിധ വകുപ്പുകള്
തിരുവനന്തപുരം: കേരള സംസ്ഥാന രൂപീകരണത്തിന്റെ 75ാം വാര്ഷികമായ 2031ല് കൈവരിക്കേണ്ട വികസന ലക്ഷ്യങ്ങള് ആസൂത്രണം ചെയ്യുന്നതിനായി സംസ്ഥാന സര്ക്കാറിന്റെ വിവിധ വകുപ്പുകള് സംഘടിപ്പിക്കുന്ന 'വിഷന് 2031' സെമിനാറുകള്ക്കുള്ള ഒരുക്കങ്ങള് ഊര്ജിതമായി. വിവിധ ജില്ലകളില് സംഘാടന സമിതി രൂപീകരണം ഉള്പ്പെടെയുള്ള മുന്നൊരുക്കങ്ങളാണ് പുരോഗമിക്കുന്നത്. വിവിധ മേഖലകളിലെ വിദഗ്ധരുടെ അഭിപ്രായങ്ങള് ക്രോഡീകരിച്ച് സമഗ്രമായ വികസന രേഖ തയ്യാറാക്കുകയാണ് ഈ സെമിനാറുകളുടെ പ്രധാന ലക്ഷ്യം.
വിവിധ വകുപ്പുകളുടെ നേതൃത്വത്തില് 33 സെമിനാറുകളാണ് സംസ്ഥാനത്തുടനീളം നടക്കുന്നത്. സാമൂഹ്യനീതി വകുപ്പിന്റെ ആഭിമുഖ്യത്തില് സംഘടിപ്പിച്ച ആദ്യ സെമിനാര് ഒക്ടോബര് 3നു തൃശൂരില് ഉന്നതവിദ്യാഭ്യാസ-സാമൂഹ്യ നീതി വകുപ്പ് മന്ത്രി ഡോ. ആര് ബിന്ദു ഉദ്ഘാടനം ചെയ്തു. റവന്യൂ വകുപ്പിന്റെ സെമിനാര് ഒക്ടോബര് 25നും സാംസ്കാരിക വകുപ്പിന്റേത് ഒക്ടോബര് 31നും തൃശൂരില് നടക്കും. റവന്യൂ വകുപ്പിന്റെ സംഘാടക സമിതി യോഗം ഒക്ടോബര് 3ന് ചേര്ന്നിരുന്നു.
വൈദ്യുതി വകുപ്പിന്റെ സെമിനാര് ഒക്ടോബര് 24നു പാലക്കാട്ട് ജില്ലയിലെ മലമ്പുഴ ട്രൈപന്റയിലാണ് നടക്കുക. ഇതിന്റെ സംഘാടക സമിതി രൂപീകരണം ഒക്ടോബര് 4നു വൈകിട്ട് 3 മണിക്ക് കളക്ടറേറ്റ് കോണ്ഫറന്സ് ഹാളില് നടക്കും. എക്സൈസ് വകുപ്പിന്റെ സെമിനാര് ഒക്ടോബര് 23നു രാവിലെ 10 മണിക്ക് കോസ്മോപൊളിറ്റന് ക്ലബ്ബിലും തദ്ദേശസ്വയംഭരണ വകുപ്പിന്റേത് ഒക്ടോബര് 13നു രാവിലെ 9.30ന് ഇതേ ക്ലബ്ബിലുമാണ് നടക്കുക. തദ്ദേശസ്വയംഭരണ വകുപ്പിന്റെ സംഘാടക സമിതി സെപ്റ്റംബര് 25നു രൂപീകരിച്ചിരുന്നു. എക്സൈസ് വകുപ്പിന്റെ സമിതി രൂപീകരണം ഒക്ടോബര് 11നു നടക്കും.
ആരോഗ്യ വകുപ്പിന്റെ സെമിനാര് ഒക്ടോബര് 14നും ഗതാഗത വകുപ്പിന്റേത് ഒക്ടോബര് 15നും പത്തനംതിട്ടയില് തിരുവല്ല ബിലീവേഴ്സ് ചര്ച്ച് ഹാളിലാണ് നടക്കുക. മലപ്പുറം ജില്ലയിലെ റോസ് ലോഞ്ച് ഓഡിറ്റോറിയത്തില് ഒക്ടോബര് 12, 13 തീയതികളിലാണ് കായിക വകുപ്പിന്റെ സെമിനാര്. ഇതിന്റെ സംഘാടക സമിതി സെപ്റ്റംബര് 20നു രൂപീകരിച്ചു. വനിതാ-ശിശു വികസന വകുപ്പിന്റെ സെമിനാര് ഒക്ടോബര് 16നു തിരൂര് ബിയാന് കോ ക്യാസിലില് നടക്കും.
വയനാട്ടില് മാനന്തവാടി ഗവ. വൊക്കേഷണല് ഹയര് സെക്കണ്ടറി സ്കൂള് ഇന്ഡോര് സ്റ്റേഡിയത്തില് ഒക്ടോബര് 25നാണ് പട്ടികജാതി-പട്ടികവര്ഗ-പിന്നാക്ക ക്ഷേമ വകുപ്പിന്റെ സെമിനാര്. തൊഴില്-നൈപുണ്യ വകുപ്പിന്റെ സെമിനാര് ഒക്ടോബര് 30നു കൊല്ലം ജില്ലയില് നടക്കും.
പൊതുമരാമത്ത് വകുപ്പിന്റെ സെമിനാര് ഒക്ടോബര് 18നു കോഴിക്കോട് ആസ്പിന് കോര്ട്ട് യാര്ഡില് നടക്കും. യുവജനക്ഷേമ വകുപ്പിന്റേത് ഒക്ടോബര് 21നു കോഴിക്കോട് കണ്ടംകുളം ജൂബിലി ഹാളിലാണ്. പുരാവസ്തു, പുരാരേഖ, മ്യൂസിയം വകുപ്പുകളുടെ സെമിനാര് ഒക്ടോബര് 17നു കാസര്ഗോഡ് കാഞ്ഞങ്ങാട്ട് നടക്കും.
ന്യൂനപക്ഷ ക്ഷേമ വകുപ്പിന്റെ സെമിനാര് ഒക്ടോബര് 16നു എറണാകുളം ഫോര്ട്ട് കൊച്ചി വെളി ഗ്രൗണ്ടിലും രജിസ്ട്രേഷന് വകുപ്പിന്റേത് ഒക്ടോബര് 14നു എറണാകുളം ചെറായിലുമാണ് സംഘടിപ്പിക്കുന്നത്. ഉന്നതവിദ്യാഭ്യാസ വകുപ്പിന്റെ സെമിനാര് ഒക്ടോബര് 18നു കോട്ടയം മാമന് മാപ്പിള ഹാളില് നടക്കും.
വിഷന് 2031ന്റെ ഭാഗമായി തയ്യാറാക്കുന്ന നയരേഖ കേരളത്തിന്റെ ഭാവി വികസനത്തിന് വ്യക്തമായ ദിശാബോധം നല്കുമെന്നാണ് സര്ക്കാര് പ്രതീക്ഷിക്കുന്നത്.