വെള്ളാപ്പള്ളി നടേശന്റെ പത്മഭൂഷണ് പിന്വലിക്കണം; ഹൈക്കോടതിയില് പൊതുതാല്പ്പര്യ ഹരജി
കൊച്ചി: എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്റെ പത്മഭൂഷണ് പിന്വലിക്കണമെന്ന് ആവശ്യപ്പെട്ട് ഹൈക്കോടതിയില് പൊതു താല്പ്പര്യ ഹരജി. ശ്രീനാരായണ ധര്മ്മ പ്രബോധന സംരക്ഷണ സമിതിയാണ് കോടതിയെ സമീപിച്ചത്.കേന്ദ്രത്തിന് കോടതി നോട്ടിസ് അയച്ചു.
അനേകം തട്ടിപ്പ് കേസുകളില് പ്രതിയായ ഒരാള്ക്ക് പുരസ്കാരം നല്കുന്നത് നിയമ വിരുദ്ധമാണെന്നാണ് ഹരജി. 21 ക്രിമിനല് കേസുകളില് പ്രതിയാണ്. പത്മവിഭൂഷണ് ജേതാവ് കൂടിയായ വി എസ് അച്യുതാനന്ദന് നല്കിയ പരാതിയില് വിജിലന്സ് രജിസ്റ്റര് ചെയ്ത കേസിലെ പ്രതിയാണ് വെള്ളാപ്പള്ളി. പണം കൊടുത്താണോ പുരസ്കാരം ലഭിച്ചതെന്ന് വെള്ളാപ്പള്ളി വ്യക്തമാക്കണമെന്നും എസ്എന്ഡിപി സംരക്ഷണ സമിതി ആവശ്യപ്പെട്ടിരുന്നു.
77ാം റിപ്പബ്ലിക് ദിനത്തോടനുബന്ധിച്ച് പ്രഖ്യാപിച്ച പത്മ പുരസ്കാരങ്ങളിലാണ് വെള്ളാപ്പള്ളി നടേശന് പത്മഭൂഷണ് ലഭിച്ചത്. പൊതുരംഗത്തെ പ്രവര്ത്തനങ്ങള്ക്കുള്ള സംഭാവനകള് കണക്കിലെടുത്താണ് വെള്ളാപ്പള്ളിക്ക് പത്മഭൂഷണ് നല്കാന് തീരുമാനിച്ചതെന്നാണ് റിപോര്ട്ടുകള്. വി എസ് അച്യുതാനന്ദന്, ജസ്റ്റിസ് കെ ടി തോമസ്, ജന്മഭൂമി മുന് പത്രാധിപര് എന് നാരായണന് എന്നിവരാണ് കേരളത്തില്നിന്ന് ഇത്തവണ പത്മവിഭൂഷണ് പുരസ്കാരത്തിന് അര്ഹരായ മറ്റു പ്രമുഖര്.