സംസ്ഥാനത്ത് യുവി സൂചികയില് മുന്നറിയിപ്പ്; മൂന്നാറില് ഓറഞ്ച് അലേര്ട്ട്
തിരുവനന്തപുരം: സംസ്ഥാനത്ത് അള്ട്രാവയലറ്റ് (യുവി) സൂചിക ഉയര്ന്ന നിലയില് തുടരുന്നതിനാല് ജാഗ്രത നിര്ദേശം പുറപ്പെടുവിച്ചു. കഴിഞ്ഞ 24 മണിക്കൂറില് സംസ്ഥാനത്ത് ഏറ്റവും ഉയര്ന്ന യുവി സൂചിക (8) മൂന്നാറില് രേഖപ്പെടുത്തി. ഇതിന്റെ അടിസ്ഥാനത്തില് ഇടുക്കി ജില്ലയില് ഓറഞ്ച് അലേര്ട്ട് പ്രഖ്യാപിച്ചു. കൊട്ടാരക്കര, കോന്നി, ചെങ്ങന്നൂര്, ചങ്ങനാശ്ശേരി, ഒല്ലൂര്, തൃത്താല, പൊന്നാനി, മാനന്തവാടി എന്നിവിടങ്ങളില് യെല്ലോ അലേര്ട്ടും നിലവിലുണ്ട്. പകല് 10 മുതല് വൈകുന്നേരം മൂന്നു വരെയുള്ള സമയങ്ങളില് യുവി സൂചിക ഉയര്ന്ന നിലയില് രേഖപ്പെടുത്തുന്ന സാഹചര്യത്തില് നേരിട്ട് സൂര്യപ്രകാശം കൂടുതല് നേരം ശരീരത്തില് ഏല്ക്കുന്നത് പരമാവധി ഒഴിവാക്കണമെന്ന് അധികൃതര് നിര്ദേശിച്ചു.
തുടര്ച്ചയായി ഉയര്ന്ന അള്ട്രാവയലറ്റ് രശ്മികള് ശരീരത്തില് ഏല്ക്കുന്നത് സൂര്യാതാപം, ത്വക്ക് രോഗങ്ങള്, നേത്രരോഗങ്ങള് തുടങ്ങിയ ആരോഗ്യപ്രശ്നങ്ങള്ക്ക് കാരണമാകാം. പുറം ജോലികളില് ഏര്പ്പെടുന്നവര്, കടലിലും ഉള്നാടന് മല്സ്യബന്ധനത്തിലും പ്രവര്ത്തിക്കുന്ന മന്സ്യത്തൊഴിലാളികള്, ജലഗതാഗത തൊഴിലാളികള്, ബൈക്ക് യാത്രക്കാര്, വിനോദസഞ്ചാരികള്, ചര്മ്മനേത്ര രോഗികളായവര്, കാന്സര് രോഗികള്, രോഗപ്രതിരോധ ശേഷി കുറഞ്ഞവര് തുടങ്ങിയവര് പ്രത്യേകം ജാഗ്രത പാലിക്കണമെന്നും മുന്നറിയിപ്പില് പറയുന്നു.
പകല് സമയങ്ങളില് പുറത്തിറങ്ങുമ്പോള് തൊപ്പി, കുട, സണ്ഗ്ലാസ് എന്നിവ ഉപയോഗിക്കുകയും ശരീരം മുഴുവന് മറയ്ക്കുന്ന കോട്ടണ് വസ്ത്രങ്ങള് ധരിക്കുകയും ചെയ്യുന്നത് ഉചിതമാണ്. യാത്രകളില് ഇടവേളകളില് തണലില് വിശ്രമിക്കാന് ശ്രമിക്കണമെന്നും നിര്ദേശിച്ചിട്ടുണ്ട്. മലമ്പ്രദേശങ്ങളിലും ഉഷ്ണമേഖല പ്രദേശങ്ങളിലും സാധാരണയായി യുവി സൂചിക ഉയര്ന്നതായിരിക്കുമെന്നതിനാല് ആ മേഖലകളില് താമസിക്കുന്നവരും പ്രത്യേക ശ്രദ്ധ പുലര്ത്തണമെന്ന് ദുരന്തനിവാരണ അതോറിറ്റി വ്യക്തമാക്കി.