രാഹുല് മാങ്കൂട്ടത്തിലിന് എതിരായ മൂന്നാമത്തെ ബലാല്സംഗ പരാതി; പരാതിക്കാരിക്കെതിരേ ഫെന്നി നൈനാന് രംഗത്ത്
പത്തനംതിട്ട: രാഹുല് മാങ്കൂട്ടത്തിലിന് എതിരായ മൂന്നാമത്തെ ബലാല്സംഗ പരാതിയില് പരാതിക്കാരിക്കെതിരെ കോണ്ഗ്രസ് നേതാവും രാഹുലിന്റെ സുഹൃത്തുമായ ഫെന്നി നൈനാന് രംഗത്ത്. പരാതിക്കാരിയുമായുള്ള വാട്സ് ആപ്പ് ചാറ്റ് എന്ന പേരില് സ്ക്രീന് ഷോട്ടുകളും ഫെനി ഫെനി ഫേസ്ബുക്കില് പങ്കുവച്ചു.
രാഹുലിനെ സ്വകാര്യമായി കാണണമെന്ന് രണ്ടുമാസം മുന്പും യുവതി ആവശ്യപ്പെട്ടു. ഓഫീസില് എത്താന് ആവശ്യപ്പെട്ടപ്പോള് സ്വകാര്യമായി കാണണമെന്ന് പറഞ്ഞു. രാത്രിയായാലും കുഴപ്പമില്ല എന്ന് അറിയിച്ചുവെന്നാണ് ഫെനി നൈനാന് അവകാശപ്പെടുന്നത്.
പാലക്കാട് ഓഫീസില് ചെന്നാല് കാണാം എന്ന് പറഞ്ഞപ്പോള് അത് പോര സ്വകാര്യത വേണം എന്നും ഓഫീസില് എപ്പോഴും പാര്ട്ടിക്കാരും സ്റ്റാഫും ഒക്കെ ആയത് കൊണ്ട് സ്വകാര്യത ലഭിക്കില്ലെന്നും അവര് പറഞ്ഞതായി ഫെനി നൈനാന് പറഞ്ഞു.
രാഹുല് എംഎല്എയുടെ ഫ്ലാറ്റില് കാണാം എന്നും മൂന്ന് നാല് മണിക്കൂര് എങ്കിലും സമയം വേണം എന്നും പരാതിക്കാരി തന്നോട് പറഞ്ഞു. ഫ്ലാറ്റില് രാത്രിയാണെങ്കിലും കണ്ടാല് മതിയെന്ന് അവര് പറഞ്ഞു. ഫ്ലാറ്റില് അസൗകര്യം ആണെന്ന് പറഞ്ഞപ്പോള് എങ്കില് ഒരു ഡ്രൈവ് പോകണം എന്നും എംഎല്എ ബോര്ഡ് വച്ച വണ്ടി വേണ്ട അവര് വരുന്ന വണ്ടി മതി എന്നും അവര് എന്നോട് പറഞ്ഞെന്നും ഫെനി നൈനാന് പറയുന്നു.
രാഹുല് മാങ്കൂട്ടത്തില് ബലാല്സംഗം ചെയ്തു എന്ന വിവരം തനിക്ക് അതിശയമായി തോന്നി എന്നാണ് ഇന്നലെ ഫെനി ഫേസ്ബുക്കില് കുറിച്ചത്. 2024ല് മൂന്ന് മണിക്കൂര് ബലാല്സംഗം ചെയ്ത ആളെ 2025 ഒക്ടോബറില് അതേ മൂന്ന് മണിക്കൂര് ഒറ്റയ്ക്ക് കാണണം എന്ന് പറയുന്നതിന്റെ ലോജിക് എന്താണെന്നും ഫെനി നൈനാന് ചോദിച്ചു.