പൊതുസ്ഥലത്തെ ശ്രദ്ധ സ്വകാര്യസ്ഥലങ്ങളിലില്ല; അപകടം വരുത്തിവയ്ക്കരുതെന്ന് മുഖ്യമന്ത്രിയുടെ ഉപദേശം
തിരുവനന്തപുരം: പൊതുസ്ഥലങ്ങളിലെ ശ്രദ്ധ സംസ്ഥാനത്തുള്ളവര് സ്വകാര്യ ഇടങ്ങളില് കാണിക്കുന്നില്ലെന്ന് മുഖ്യമന്ത്രിയുടെ വിമര്ശനം. തിരുവനന്തപുരത്ത് നടത്തിയ വാര്ത്താസമ്മേളനത്തിലാണ് മുഖ്യമന്ത്രി മുന്നറിയിപ്പു നല്കിയത്.
പൊതുസ്ഥലത്ത് പുലര്ത്തുന്ന ശ്രദ്ധ മിക്കയാളുകളും സ്വന്തം വീടുകളിലോ ജോലി സ്ഥലത്തോ കാണിക്കുന്നില്ല. അശ്രദ്ധമായ പെരുമാറ്റ രീതികള് രോഗവ്യാപനത്തെ വര്ദ്ധിപ്പിക്കുന്നു. വീട്ടില് ഒരാള്ക്ക് രോഗം വന്നാല് മറ്റെല്ലാവര്ക്കും രോഗം പിടിപെടുമെന്ന അവസ്ഥയാണുള്ളത്. അത്ര നിഷ്പ്രയാസം സാധിക്കാവുന്ന കാര്യമല്ലെങ്കിലും, വീടുകളിലും തൊഴില് സ്ഥലങ്ങളിലും കൂടുതല് മികച്ച രീതിയില് ജാഗ്രത പുലര്ത്താന് എല്ലാവരും ശ്രദ്ധിക്കണമെന്ന് മുഖ്യമന്ത്രി അഭ്യര്ത്ഥിച്ചു.
ക്വാറന്റയിനില് കഴിയേണ്ടവര് പ്രോട്ടോകോള് ലംഘിച്ച് പുറത്തിറങ്ങാന് പാടില്ല. അത്തരം ലംഘനങ്ങള് കണ്ടെത്തിയാല് കര്ക്കശ നടപടി സ്വീകരിക്കും. ഓഫിസുകളും സ്ഥാപനങ്ങളും തുറന്നിരിക്കുന്ന ഈ സമയത്ത് എല്ലാവരും അടിസ്ഥാനപരമായ പ്രതിരോധ മാര്ഗങ്ങളില് ശ്രദ്ധ വെക്കണം. പുറത്തിറങ്ങുന്നവര് എന് 95 മാസ്കോ, ഡബിള് മാസ്കോ ഉപയോഗിക്കണം. ഓഫിസുകളിലും സ്ഥാപനങ്ങളിലും മാസ്ക് നിര്ബന്ധമാണ്. പൊതുസ്ഥലങ്ങളേക്കാള് രോഗപ്രസരണം കൂടുതലായി കാണുന്നത് സ്വകാര്യ സ്ഥലങ്ങളിലാണ്. വീടുകള്, ഓഫിസുകള്, കടകള് തുടങ്ങിയ ഇടങ്ങളില് രോഗം വളരെ കൂടുതല് വ്യാപിക്കുന്നതായാണ് കാണുന്നത്. പ്രധാനമായും രണ്ടു കാരണങ്ങളാണ് ഇതിന് ഇടയാക്കുന്നത്. ഒന്നാമത്തെ പ്രശ്നം ഇവ കൃത്യമായ വായു സഞ്ചാരമില്ലാത്ത രീതിയിലാണ് ഉപയോഗിക്കപ്പെടുന്നത് എന്നതാണ്. അടഞ്ഞു കിടക്കുന്ന മുറികള് രോഗവ്യാപനത്തെ ത്വരിതപ്പെടുത്തും. ഓഫിസുകളും സ്ഥാപനങ്ങളും തുറക്കുമ്പോള് വാതിലുകളും ജനാലകളും തുറന്നിടേണ്ടതാണ്. സാധ്യമാകുന്നിടത്തൊക്കെ എ.സി. ഒഴിവാക്കണം. സ്ഥാപനത്തിലുള്ള എല്ലാവരും മാസ്ക് ധരിക്കണം. ഒരുമിച്ചിരുന്ന് ഭക്ഷണം കഴിക്കുന്നത് ഒഴിവാക്കണം. ജനിതകമാറ്റം വന്ന വൈറസിന്റെ വ്യാപനം നിലനില്ക്കുന്നതിനാല് ഓഫിസുകളിലും വ്യാപാര സ്ഥാപനങ്ങളിലും വലിയ വ്യാപനം ഒഴിവാക്കാന് എല്ലാവരും പ്രത്യേകമായി ശ്രദ്ധിക്കേണ്ടതാണ്. സ്ഥാപനങ്ങളില് തിരക്ക് അനുവദിക്കരുത് തുടങ്ങിയ നിര്ദേശങ്ങളും മുഖ്യമന്ത്രി നല്കി.