അച്ചടക്ക ലംഘനമെന്ന്; കോണ്ഗ്രസ് നേതാവ് മമ്പറം ദിവാകരനെ പുറത്താക്കി
കെപിസിസി പ്രസിഡന്റ് കെ സുധാകരനും മമ്പറം ദിവാകരനും നേരത്തെ പരസ്യപ്രസ്താവനകളിലൂടെ ഏറ്റുമുട്ടിയിരുന്നു.
തിരുവനന്തപുരം: കണ്ണൂരിലെ മുതിര്ന്ന കോണ്ഗ്രസ് നേതാവ് മമ്പറം ദിവാകരനെ പാര്ട്ടിയില് നിന്ന് പുറത്താക്കി. തലശ്ശേരി ഇന്ദിരാഗാന്ധി സഹകരണ ആശുപത്രി ചെയര്മാന് മമ്പറം ദിവാകരനെ പാര്ട്ടി അച്ചടക്ക ലംഘനത്തിന്റെ പേരില് കോണ്ഗ്രസില് നിന്നും പുറത്താക്കിയതായി കെപിസിസി ജനറല് സെക്രട്ടറി ടിയു രാധാകൃഷ്ണന് അറിയിച്ചു.
ഹോസ്പിറ്റല് സൊസൈറ്റി തിരഞ്ഞെടുപ്പുമായി ബന്ധപ്പെട്ട് കണ്ണൂര് ഡിസിസി അംഗീകരിച്ച കോണ്ഗ്രസിന്റെ ഔദ്യോഗിക പാനലിനെതിരായി പാര്ട്ടി നേതൃത്വത്തെ ധിക്കരിച്ച് ബദല് പാനലില് മത്സരിക്കുന്ന നിലവിലെ പ്രസിഡന്റ് മമ്പറം ദിവാകരന് ഗുരുതരമായ അച്ചടക്ക ലംഘനമാണ് കാട്ടിയതെന്നും അതിനാലാണ് അദ്ദേഹത്തെ പാര്ട്ടിയില് നിന്നും പുറത്താക്കുന്നതെന്നും രാധാകൃഷ്ണന് വാര്ത്താക്കുറുപ്പില് പറഞ്ഞു.
മമ്പറം മണ്ഡലം കോണ്ഗസ് കമ്മിറ്റി പ്രസിഡന്റ് കെകെ പ്രസാദിനെ സ്ഥാനത്ത് നിന്ന് നീക്കി. മമ്പറം ദിവാകരന് വേണ്ടി പ്രവര്ത്തിച്ചതിനെ തുടര്ന്നാണ് നടപടി. ഡിസിസി ജനറല് സെക്രട്ടറി പൊന്നമ്പത്ത് ചന്ദ്രന് താല്ക്കാലിക ചുമതല നല്കി.
ഇപ്പോഴത്തെ കെപിസിസി പ്രസിഡന്റ് കെ സുധാകരനും മമ്പറം ദിവാകരനും നേരത്തെ പരസ്യപ്രസ്താവനകളിലൂടെ ഏറ്റുമുട്ടിയിരുന്നു. സുധാകരനെ കോണ്ഗ്രസ് അധ്യക്ഷനാക്കുന്നതില് മമ്പറം ദിവാകരന് കോണ്ഗ്രസ് നേതൃത്വത്തെ അതൃപ്തി അറിയിച്ചിരുന്നു. ബ്രണ്ണന് കോളജ് വിവാദവുമായി ബന്ധപ്പെട്ടും സുധാകരനും മമ്പറം ദിവാകരനും തമ്മിലിടഞ്ഞു.
കെ സുധാകരന് പക്വത കാണിക്കണമെന്നായിരുന്നു കെപിസിസി അധ്യക്ഷനായ ശേഷം ബ്രണ്ണന് വിവാദങ്ങളുയര്ത്തിയതില് മമ്പറം ദിവാകരന്റെ പ്രതികരണം. കോണ്ഗ്രസ് അധ്യക്ഷ പദവി ഏറ്റെടുത്തതിന് പിന്നാലെ നടത്തിയ വാര്ത്താ സമ്മേളനത്തില് മമ്പറം ദിവാകരന് കോണ്ഗ്രസിന് അകത്താണോ പുറത്താണോ എന്ന് തനിക്കറിയില്ലെന്ന സുധാകരന്റെ പ്രസ്താവനയും വിവാദമായിരുന്നു. സുധാകരനെതിരെ മമ്പറം ദിവാകരന് നടത്തിയ ചില പ്രസ്താവനകള് സിപിഎം ആയുധമാക്കി.