രാഹുല് ഗാന്ധിയുടെ എംപി സ്ഥാനം റദ്ദാക്കണമെന്നുള്ള സരിതയുടെ ഹരജി: സുപ്രിംകോടതി ഇന്ന് പരിഗണിക്കും
ന്യൂഡല്ഹി: വയനാട്ടില് രാഹുല് ഗാന്ധിയുടെ എംപി സ്ഥാനം റദ്ദാക്കണമെന്ന് ആവശ്യപ്പെട്ട് സരിത നായര് സമര്പ്പിച്ച ഹര്ജി ഇന്ന് സുപ്രിം കോടതി പരിഗണിക്കും. എസ്എ ബോബ്ഡെ അദ്ധ്യക്ഷനായ ബെഞ്ചാണ് ഹര്ജി പരിഗണിക്കുക. രണ്ടാം തവണയാണ് എംപി സ്ഥാനം റദ്ദാക്കണമെന്ന് ആവശ്യപ്പെട്ട് സരിത സുപ്രിം കോടതിയെ സമീപിക്കുന്നത്.തന്റെ നാമനിര്ദേശ പത്രിക തള്ളിയത് ചോദ്യം ചെയ്തായിരുന്നു സരിതയുടെ ഹരജി.
വയനാട് മണ്ഡലത്തില് വീണ്ടും തിരഞ്ഞെടുപ്പ് നടത്തണമെന്നും ഹരജിയില് ആവശ്യപ്പെട്ടിട്ടുണ്ട്.വയനാട്ടിലെ പത്രിക തള്ളിയ നടപടിയില് വരണാധികാരിയുടെ ഭാഗത്ത് പിഴവുണ്ടായെന്നും അതിനാല് തിരഞ്ഞെടുപ്പ് റദ്ദാക്കണമെന്നുമാണ് സരിതയുടെ ആവശ്യം. തിരഞ്ഞെടുപ്പ് ഹരജിയായതിനാല് സുപ്രിംകോടതി രാഹുല് ഗാന്ധിക്ക് നോട്ടീസ് അയച്ചേക്കും. 431770 വോട്ടിന്റെ ഭൂരിപക്ഷത്തിലാണ് വയനാട് മണ്ഡലത്തില് രാഹുല് വിജയിച്ചത്.
2019 ലോക്സഭാ തിരഞ്ഞെടുപ്പില് വയനാട് മണ്ഡലത്തില് നിന്ന് ലോക്സഭയിലേക്ക് മത്സരിക്കാന് സരിത നല്കിയ നാമനിര്ദ്ദേശ പത്രിക തള്ളിയിരുന്നു. സോളാര് കേസില് സരിതയെ കോടതി ശിക്ഷിച്ച സാഹചര്യം ചൂണ്ടിക്കാട്ടിയായിരുന്നു പത്രിക തള്ളിയത്. അതേസമയം രാഹുലിനെതിരെ മത്സരിക്കാന് അമേതി മണ്ഡലത്തില് നല്കിയ പത്രിക വരണാധികാരി സ്വീകരിക്കുകയും ചെയ്തു.