സുന്നീ ജമാഅത്ത് മീലാദ് നേതൃത്വം നല്കുന്ന വയോജന സംഗമങ്ങള്ക്ക് തുടക്കമായി
കൊച്ചി: സുന്നീ ജമാഅത്ത് റബീഉല് അവ്വല് ഒന്നു മുതല് സംസ്ഥാന തലത്തില് മീലാദ് ക്യാമ്പയിനിന്റെ ഭാഗമായി നരച്ചവരെ നിരസിക്കരുത് എന്ന പ്രമേയത്തില് നടക്കുന്നു വയോജന സംഗമങ്ങളുടെ സംസ്ഥാനതല ഉദ്ഘാടനം എറണാകുളം ജില്ലയിലെ കൂവള്ളൂര് മജ്ലിസുന്നൂര് കാംപസില് നടന്നു. ഒക്ടോബര് 16 മുതല് 22 വരെ ഒരു വാരമാണ് വയോജന സംഗമങ്ങള്.
മനുഷ്യ ജീവിതത്തിന്റെ മൂന്നാം ഘട്ടമായ വാര്ദ്ധക്യം ശൈശവം പോലെ തന്നെ ദൗര്ബല്യവും ചാപല്യവും നിറഞ്ഞതാകയാല് വൃദ്ധരും നരച്ചവരും സമൂഹത്തിന്റെ പ്രത്യേക കാരുണ്യവും പരിഗണനയും അര്ഹിക്കുന്നവരാണെന്ന് മുഖ്യപ്രഭാഷണം നടത്തിയ സിറാജുദ്ദീന് മൗലവി വീരമംഗലം അഭിപ്രായപ്പെട്ടു. സ്രഷ്ടാവായ അല്ലാഹുവിനെ മാനിക്കുന്നതിന്റെ ഭാഗം തന്നെയാണ് നരച്ചവരെ മാനിക്കുന്നതെന്ന് ഇസ് ലാം പഠിപ്പിക്കുന്നു. അഭൗതികമായ ജീവിതൈശ്വര്യം വൃദ്ധരോടൊപ്പമാണെന്ന തിരുവചനം പ്രസക്തമാണെന്നും വളര്ന്നു വരുന്ന ഉപഭോഗ സംസ്കാരത്തിന്റെയും പ്രയോജനവാദത്തിന്റെയും പരിണിതിയെന്നോണം പുതിയ സമൂഹത്തില് മുളച്ചുപൊന്തുന്ന വൃദ്ധസദനങ്ങള് ആശങ്കയുളവാക്കുന്നതാണെന്നും അദ്ദേഹം ചൂണ്ടിക്കാട്ടി.
പാണക്കാട് സയ്യിദ് അബ്ദുല് ഖയ്യും ശിഹാബ് തങ്ങള് ഉദ്ഘാടനം ചെയ്തു. വിവിധ സംഘടനാ നേതാക്കളായ വി.പി ഫരീദുദ്ദീന് ഉസ്താദ് (സംസ്ഥാന ജംഇയ്യത്തുല് ഉലമാ ), വി എച്ച് മുഹമ്മദ് മൗലവി (ദക്ഷിണ കേരളാ ജംഇയ്യത്തുല് ഉലമാ), ബാവാ ദാരിമി (അഖിലേന്ത്യാ സുന്നീ ജംഇയ്യത്തുല് ഉലമാ), അഷ്റഫ് അഷ്റഫി (സമസ്ത കേരളാ ജംഇയ്യത്തുല് ഉലമാ), അഷ്റഫ് ബാഖവി കാളികാവ് (എസ്വൈഎഫ് സംസ്ഥാന ജന: സെക്രട്ടറി), ബഷീര് വഹബി അടിമാലി, സിദ്ദീഖ് ബാഖവി മണിക്കര്, ഹസന് അഷ്റഫി മുവാറ്റുപുഴ തുടങ്ങിയവര് പ്രസംഗിച്ചു.
കേരളാ സുന്നീ ജമാഅത്ത് സംസ്ഥാന സെക്രട്ടറി ഒടിയപാറ അഷ്റഫ് ബാഖവി സ്വാഗതവും ഷംസുദ്ദീന് വഹബി പോഞ്ഞാശ്ശേരി നന്ദിയും പറഞ്ഞു.