യുപിയിലെ സ്പോട്സ് ക്യാമ്പില് ഭക്ഷ്യവസ്തുക്കള് സൂക്ഷിക്കുന്നത് കക്കൂസില്; വീഡിയോ വൈറല്
ലഖ്നോ: യുപിയിലെ സ്പോട്സ് ക്യാമ്പില് ഭക്ഷ്യവസ്തുക്കള് കക്കൂസില് സൂക്ഷിക്കുന്ന വീഡിയോ സാമൂഹികമാധ്യമങ്ങളില് വൈറലായി. സഹരന്പൂര് സ്റ്റേഡിയത്തിലെ കക്കൂസിലാണ് പാകംചെയ്ത ചോറ് സൂക്ഷിച്ചിരിക്കുന്നത്. അതിന്റെ വീഡിയോയാണ് പുറത്തുവന്നത്.
17 വയസ്സിനു താഴെയുളള 200ഓളം സ്പോര്ട്സ് താരങ്ങള്ക്ക് വിളമ്പാനുള്ളതാണ് ഭക്ഷണം. സഹരന്പൂര് കബഡി ജില്ലാ ടൂര്ണമെന്റിന്റെ ഭാഗമാണ് ക്യാമ്പ് സംഘടിപ്പിച്ചത്.
എല്ലാ ആരോപണങ്ങളും സഹരന്പൂര് സ്പോര്ട്സ് ഓഫിസര് അനിമേഷ് സസ്കേന തളളിക്കളഞ്ഞു.
'ഇവിടെ കളിക്കാര്ക്ക് വിളമ്പുന്ന ഭക്ഷണം ഗുണനിലവാരമുള്ളതാണ്. അരിയും പരിപ്പും പച്ചക്കറിയും ഉള്പ്പെടെയുള്ള ഭക്ഷണം വലിയ പാത്രങ്ങളിലാണ് നീന്തല്ക്കുളത്തിന് സമീപമുള്ള പരമ്പരാഗത ഇഷ്ടിക അടുപ്പില് പാകം ചെയ്തിരുന്നത്'- അദ്ദേഹം പറഞ്ഞു.
പാത്രത്തില് നിന്ന് വേവിച്ച ചോറ് ഒരു വലിയ പ്ലേറ്റില് എടുത്ത് ഗേറ്റിനടുത്തുള്ള കക്കൂസ് തറയിലാണ് വയ്ക്കുന്നതെന്ന് ക്യാമ്പിലെ വിദ്യാര്ത്ഥികള് പറയുന്നു. അതിനടുത്താണ് പൂരിയും വച്ചിരിക്കുന്നത്. അതൊരു പേപ്പറിലാണ് ഇടുക പതിവ്- ഒരു കളിക്കാരന് പറഞ്ഞു.
ഏതാനും കളിക്കാര് ഇക്കാര്യം സ്റ്റേഡിയം ഉദ്യോഗസ്ഥരെ അറിയിച്ചു. അവര് പാചകക്കാരെ ശാസിച്ചു.