സംസ്ഥാന സീനിയര്‍ വോളി: തിരുവനന്തപുരം പുരുഷ, വനിതാ ടീമുകള്‍ സെമിയില്‍

കണ്ണൂര്‍: സംസ്ഥാന സീനിയര്‍ വോളിബോള്‍ ചാമ്പ്യന്‍ഷിപ്പില്‍ വനിത, പുരുഷ വിഭാഗത്തില്‍ തിരുവനന്തപുരം സെമിയില്‍. തൃശൂര്‍, കോഴിക്കോട്, എറണാകുളം പുരുഷന്മാരും വനിതകളില്‍ മലപ്പുറം, കോഴിക്കോട്, പത്തനംതിട്ട ടീമുകളും സെമിയിലെത്തി. പത്തനംതിട്ട നേരിട്ടുള്ള സെറ്റുകള്‍ക്ക് (20/25, 14/25, 18/25 ) ആതിഥേയരായ കണ്ണൂരിനെ പരാജയപ്പെടുത്തിയാണ് സെമിയിലെത്തിയത്. ഖെ ലോ ഇന്ത്യന്‍ താരങ്ങളുമായെത്തിയ പത്തനംതിട്ടയ്ക്ക് മുന്നില്‍ കണ്ണൂര്‍ നിഷ്പ്രഭമായി. താരനിബിഡമായ തിരുവനന്തപുരവും നേരിട്ടുള്ള സെറ്റുകള്‍ക്ക് കാസര്‍ക്കോഡിനെ (25/01, 25/03, 25/06) തുരത്തിയാണ് സെമിയിലേക്ക് കുതിച്ചത്.

പുരുഷ വിഭാഗത്തില്‍ ഏകപക്ഷീയ സെറ്റുകള്‍ക്ക് കാസര്‍കോഡിനെ തകര്‍ത്താണ് തിരുവനന്തപുരം സെമി ഉറപ്പിച്ചത്. (സ്‌കോര്‍:25/15, 25/22, 25/19 ). തൃശൂര്‍ നേരിട്ടുള്ള സെറ്റുകള്‍ക്ക് വയനാടിനെ (25/20, 25/17, 25/22) പരാജയപ്പെടുത്തിയാണ് സെമിയില്‍ പ്രവേശിച്ചത്.

കണ്ണൂര്‍ പുരുഷന്മാരും സെമി കാണാതെ പുറത്തായി. രണ്ടാം സെറ്റില്‍ മാത്രമാണ് കണ്ണൂര്‍ ഒപ്പത്തിനൊപ്പം നിന്നത്. കോഴിക്കോട് ഏകപക്ഷീയ സെറ്റുകള്‍ക്ക് (25/14, 27/25, 25/23) കണ്ണൂരിനെ മറികടന്ന് സെമി ഉറപ്പിച്ചു. മലപ്പുറത്തെ ആവേശപ്പോരില്‍ കീഴടക്കിയാണ് താരസമ്പന്നമായ എറണാകുളം സെമിക്കെത്തുന്നത്. ഒന്നിനെതിരെ മൂന്ന് സെറ്റുകള്‍ക്കാണ് (25/12, 17/25, 25/21, 25/23 ) മലപ്പുറത്തെ എറണാകുളം പരാജയപ്പെടുത്തിയത്. വനിത സെമിയില്‍ തിങ്കള്‍ പകല്‍ രണ്ടിന് പത്തനംതിട്ടയും മലപ്പുറവും വൈകിട്ട് 3.30ന് തിരുവനന്തപുരവും കോഴിക്കോടും ഏറ്റുമുട്ടും. പുരുഷ സെമിയില്‍ വൈകിട്ട് 5.30 ന് തിരുവനന്തപുരത്തെ തൃശൂരും രാത്രി ഏഴിന് കോഴിക്കോടിനെ എറണാകുളവും നേരിടും.