എസ്എസ്എല്സി പരീക്ഷ മാര്ച്ച് 30 മുതല് ഏപ്രില് 29വരെ; സംസ്ഥാനത്തെ എസ്എസ്എല്സി, പ്ലസ് ടു പരീക്ഷാ തിയ്യതികള് പ്രഖ്യാപിച്ചു
എസ്എസ്എല്സി പരീക്ഷ മാര്ച്ച് 30 മുതല് ഏപ്രില് 29 വരെയും പ്ലസ് ടു പരീക്ഷ മാര്ച്ച് 30 മുതല് ഏപ്രില് 22 വരെയും നടത്താന് നിശ്ചയിച്ചു
തിരുവനന്തപുരം: സംസ്ഥാനത്തെ എസ്എസ്എല്സി, പ്ലസ് ടു, വൊക്കേഷണല് ഹയര് സെക്കണ്ടറി പരീക്ഷാ തിയ്യതികള് പ്രഖ്യാപിച്ചു. മന്ത്രി വി ശിവന്കുട്ടി കാഞ്ഞങ്ങാട് വാര്ത്താസമ്മേളനത്തില് ആണ് തിയ്യതികള് പ്രഖ്യാപിച്ചത്.
2022 മാര്ച്ച് 31 മുതല് ഏപ്രില് 29 വരെയാണ് എസ്എസ്എല്സി പരീക്ഷ. മാര്ച്ച് 30 മുതല് ഏപ്രില് 22 വരെ പ്ലസ് ടു/വൊക്കേഷനല് ഹയര് സെക്കണ്ടറി പരീക്ഷകള് നടക്കും.
എസ്എസ്എല്സി മോഡല് പരീക്ഷ മാര്ച്ച് 21 മുതല് 25 വരെ നടക്കും. മാര്ച്ച് 16 മുതല് മാര്ച്ച് 21 വരെയാണ് പ്ലസ് ടു/വൊക്കേഷനല് ഹയര് സെക്കണ്ടറി മോഡല് പരീക്ഷ.
എസ്എസ്എല്സി ഐടി പ്രാക്റ്റിക്കല് പരീക്ഷകള് മാര്ച്ച് 10 മുതല് 19 വരെ നടക്കും. പ്ലസ് ടു പ്രാക്റ്റിക്കല് പരീക്ഷ ഫെബ്രുവരി 21 ന് തുടങ്ങി മാര്ച്ച് 15 ന് അവസാനിക്കും. വൊക്കേഷണല് ഹയര് സെക്കണ്ടറി പ്രാക്റ്റിക്കല് പരീക്ഷ ഫെബ്രുവരി 15 ന് ആരംഭിച്ച് മാര്ച്ച് 15 ന് അവസാനിക്കും.
അതേസമയം, സംസ്ഥാനത്ത് ബോയ്സ്ഗേള്സ് സ്കൂളുകള് കുറയ്ക്കും. ഗേള്സ്,ബോയ്സ് സ്കൂള് മാറ്റാന് പിടിഎ തീരുമാനം മതിയെന്നും മന്ത്രി വാര്ത്താസമ്മേളനത്തില് പറഞ്ഞു. കുട്ടികള് ഒന്നിച്ചിരുന്ന് പഠിക്കുന്നതിനെ പ്രോത്സാഹിപ്പിക്കും. പിടിഎ തീരുമാനിച്ചാല് മിക്സസ് സ്കൂളിന് അംഗീകാരം നല്കുമെന്നും മന്ത്രി അറിയിച്ചു.
ജെന്ട്രല് ന്യൂട്രല് യൂനിഫോം നിര്ബന്ധമെന്ന തീരുമാനം വിദ്യാഭ്യാസ വകുപ്പ് എടുത്തിട്ടില്ല. ഇത് സംബന്ധിച്ച് തീരുമാനം എടുക്കേണ്ടത് പിടിഎ ആണ്. പല സംഘടനകളും തെറ്റിദ്ധരിച്ചിരിക്കുകയാണെന്നും മന്ത്രി പറഞ്ഞു. നിലവിലെ സ്കൂള് സമയത്തില് മാറ്റം വരുത്തിയിട്ടില്ലെന്നും മന്ത്രി കൂട്ടിച്ചേര്ത്തു.