അഞ്ചു വര്ഷങ്ങള്ക്ക് മുന്പ് ശസ്ത്രക്രിയയ്ക്കിടെ വയറ്റില് കത്രിക മറന്നുവച്ചു; തെളിവ് നല്കാന് ഹാജരാകണമെന്ന് ആവശ്യപ്പെട്ട് മരിച്ചയാളുടെ പേരില് നോട്ടിസ്
തൃശൂര്: അഞ്ചു വര്ഷം മുന്പ് നടന്ന ശസ്ത്രക്രിയയ്ക്കിടെ വയറ്റില് കത്രിക മറന്നുവച്ച സംഭവത്തില് തെളിവ് നല്കാന് ഹാജരാകണമെന്ന് ആവശ്യപ്പെട്ട് മരിച്ചയാളുടെ പേരില് നോട്ടിസ്. ഒരു വര്ഷം മുന്പ് രോഗി മരിച്ച വിവരം അറിയാതെയാണ് തൃശൂര് മെഡിക്കല് കോളജില് നിന്ന് വിചാരണയ്ക്ക് പങ്കെടുക്കണമെന്ന് ചൂണ്ടിക്കാണിച്ച് നോട്ടിസ് നല്കിയത്. ശസ്ത്രക്രിയയ്ക്കിടെയുണ്ടായ ഗുരുതര വീഴ്ച ചൂണ്ടിക്കാണിച്ച് രോഗിയുടെ കുടുംബം കോടതിയില് കേസ് നടത്തി വരികയായിരുന്നു. ഇതിനിടെയാണ് സംഭവം നടന്ന് അഞ്ചു വര്ഷങ്ങള്ക്ക് ശേഷം രോഗിയോട് ഹാജരാകാന് മെഡിക്കല് കോളജ് അധികൃതര് നിര്ദേശം നല്കിയത്.
പാന്ക്രിയാസ് അടക്കമുള്ള ആന്തരിക അവയവങ്ങളില് മുഴ കണ്ടെത്തിയതിനെ തുടര്ന്നായിരുന്നു കൂര്ഞ്ചേരി മാളിയേക്കല് ജോസഫ് പോളിനെ 2020ല് തൃശൂര് മെഡിക്കല് കോളജില് പ്രവേശിപ്പിച്ചത്. രണ്ടു ശസ്ത്രക്രിയകളാണ് അന്ന് നടത്തിയത്. രണ്ടാമത്തെ ശസ്ത്രക്രിയ കഴിഞ്ഞ് ഒന്നര മാസം കഴിഞ്ഞിട്ടും വയറില് അസ്വാഭാവിക വേദന അനുഭവപ്പെടുകയായിരുന്നു. പിന്നാലെ വീണ്ടും തൃശൂര് മെഡിക്കല് കോളജില് എത്തി സിടി സ്കാനിങ്ങിന് വിധേയനായി.
വയറ്റില് പഴുപ്പുണ്ടെന്നും വീണ്ടും ഒരു ശസ്ത്രക്രിയ കൂടി നടത്തേണ്ടി വരുമെന്നുമായിരുന്നു മെഡിക്കല് കോളജില് നിന്ന് ഡോക്ടര്മാര് പറഞ്ഞത്. എന്നാല് ഇതില് സംശയം തോന്നിയ ജോസഫും കുടുംബവും സ്വകാര്യ ലാബില് നിന്നും എകസ് റേ എടുത്തു. പിന്നാലെയാണ് വയറ്റില് കത്രിക (ഫോര്സെപ്സ്) കുടുങ്ങിയതായി കണ്ടെത്തിയത്. ഉടന് സ്വകാര്യ ആശുപത്രിയില് എത്തി ശസ്ത്രക്രയയിലൂടെ കത്രിക പുറത്തെടുത്തു. തുടര്ന്ന് തൃശൂര് മെഡിക്കല് കോളജിലെ ഗ്യാസ്ട്രോ സര്ജനായ ഡോക്ടര്ക്കെതിരേ കുടുംബം പരാതി നല്കിയിരുന്നു. ഇതിനിടെ 2025 ജനുവരിയില് ജോസഫ് പോള് കാന്സര് ബാധിച്ച് മരിച്ചു. മനുഷ്യാവകാശ കമ്മീഷനില് നിന്നടക്കം വിധിയുണ്ടായിരുന്നിട്ടും അര്ഹിച്ച നഷ്ടപരിഹാരം പോലും ജോസഫിന്റെ കുടുംബത്തിന് നല്കിയിരുന്നില്ല.
ഇതിന് പിന്നാലെയാണ് 17നു മെഡിക്കല് കോളജ് പ്രിന്സിപ്പലിന്റെ നോട്ടിസ് ജോസഫിന്റെ ഭാര്യയ്ക്ക് ലഭിച്ചത്. സംഭവത്തില് ഈ മാസം 20നു തിരുവനന്തപുരം സെക്രട്ടറിയേറ്റ് അനക്സില് നേരിട്ട് ഹാജരായി തെളിവ് നല്കണമെന്നായിരുന്നു. ജോസഫ് മരിച്ച വിവരം അറിയാതെ അയച്ച കത്ത് ജോസഫിന്റെ പേരില് തന്നെയായിരുന്നു. ഇതോടെ ഭാര്യ തിരുവനന്തപുരത്തേക്ക് പുറപ്പെടാന് നില്ക്കെ അടുത്ത കത്തും വന്നു. ഹിയറിങ് മാറ്റിവച്ചതായി അറിയിച്ചുകൊണ്ടായിരുന്നു പുതിയ കത്ത്.