തിരുവനന്തപുരം: ശബരിമല സ്വര്ണക്കൊള്ള കേസില് ദേവസ്വം ബോര്ഡ് മുന് അഡ്മിനിസ്ട്രേറ്റീവ് ഓഫീസര് മുരാരി ബാബുവിനെ ഇഡി ചോദ്യം ചെയ്യും. ഹാജരാകണം എന്നാവശ്യപ്പെട്ട് മുരാരി ബാബുവിന് ഇ ഡി ഉടന് സമന്സ് അയയ്ക്കും. മുരാരി ബാബുവിന്റെ സ്വത്തുക്കള് കണ്ടുകെട്ടാനുള്ള നടപടികള് തുടങ്ങിയിരിക്കെയാണ് ചോദ്യം ചെയ്യാനുള്ള നീക്കം. നേരത്തേ ദ്വാരപാലക ശില്പത്തിലെ പാളികള് ചെമ്പാണെന്ന് മുരാരി ബാബു രേഖപ്പെടുത്തിയതിന്റെ നിര്ണായക രേഖകള് റെയ്ഡിനിടെ ഇ ഡിക്ക് ലഭിച്ചിരുന്നെന്നാണ് വിവരം.
ഇന്നലെയായിരുന്നു സ്വര്ണക്കൊള്ളയുമായി ബന്ധപ്പെട്ട് എസ്ഐടി രജിസ്റ്റര് ചെയ്ത കേസുകളില് മുരാരി ബാബുവിന് ജാമ്യം ലഭിച്ചത്. ശബരിമല സ്വര്ണക്കൊള്ളയുമായി ബന്ധപ്പെട്ട് രണ്ട് കേസുകളായിരുന്നു എസ്ഐടി രജിസ്റ്റര് ചെയ്തത്. ശബരിമല സ്വര്ണക്കൊള്ളയില് ജാമ്യം ലഭിച്ച് പുറത്തിറങ്ങുന്ന ആദ്യയാളാണ് മുരാരി ബാബു. ദ്വാരപാലക ശില്പത്തിലെ സ്വര്ണമോഷണവുമായി ബന്ധപ്പെട്ടായിരുന്നു ആദ്യ കേസ്. ഇതില് രണ്ടാം പ്രതിയായിരുന്നു മുരാരി ബാബു. ഈ കേസില് ഒക്ടോബര് 23നായിരുന്നു മുരാരി ബാബുവിനെ എസ്ഐടി അറസ്റ്റ് ചെയ്യുന്നത്.
ദ്വാരപാലക ശില്പത്തിലെ സ്വര്ണപ്പാളികള് ചെമ്പ് പാളികള് എന്ന് തെറ്റായി രേഖപ്പെടുത്തിയത് മുരാരി ബാബുവായിരുന്നുവെന്നായിരുന്നു എസ്ഐടിയുടെ കണ്ടെത്തല്. മുരാരി ബാബു ഇടപെട്ടാണ് സ്വര്ണപ്പാളികള് ഉണ്ണികൃഷ്ണന് പോറ്റിയുടെ കൈവശം നവീകരണത്തിന് അയച്ചതെന്നും എസ്ഐടി അന്വേഷണത്തില് തെളിഞ്ഞിരുന്നു.
ഇതിന്റെ അടിസ്ഥാനത്തിലായിരുന്നു മുരാരി ബാബുവിന്റെ അറസ്റ്റ്. ദ്വാരപാലക ശില്പ കേസിലും കട്ടിള പാളി കേസിലും ഒന്നിച്ച് അറസ്റ്റ് ചെയ്ത മുരാരി ബാബുവിന്റെ റിമാന്ഡ് കാലാവധി 90 ദിവസം പിന്നിട്ടിരുന്നു. എന്നാല്, ഇതുവരെ എസ്ഐടി ഇടക്കാല കുറ്റപത്രം പോലും സമര്പ്പിച്ചിരുന്നില്ല. ഇത് ചൂണ്ടിക്കാട്ടി കൊല്ലം വിജിലന്സ് കോടതിയില് മുരാരി ബാബു സമര്പ്പിച്ച ഇരു ജാമ്യഹരജികളിലും സ്വാഭാവിക ജാമ്യം അനുവദിക്കണമെന്നാണ് പ്രതിഭാഗം ആവശ്യപ്പെട്ടത്.