ജോസ് കെ മാണിയുടെ ഇടതുമുന്നണി പ്രവേശം രാഷ്ട്രീയ വഞ്ചനയെന്ന് രമേശ് ചെന്നിത്തല
തിരുവനന്തപുരം: ജോസ് കെ മാണിയുടെ ഇടത് മുന്നണി പ്രവേശം രാഷ്ട്രീയവഞ്ചനയാണെന്ന് പ്രതിപക്ഷ നേതാവ് രമേശ് ചെന്നിത്തല. കേരള കോണ്ഗ്രസിനെ സ്നേഹിക്കുകയും ഒപ്പം നില്ക്കുകയും ചെയ്ത ജനവിഭാഗങ്ങള് ഇത് അംഗീകരിക്കില്ലെന്നും അദ്ദേഹം പറഞ്ഞു.
എല്ലാ രാഷ്ട്രീയ മര്യാദകളും കാറ്റില്പ്പറത്തിക്കൊണ്ടാണ് ഇടതുമുന്നണി മാണിസാറിന്റെ പാര്ട്ടിയെ മുന്നണിയിലേക്ക് സ്വാഗതം ചെയ്യുന്നത്. മാണി സാര് നിരപരാധിയാണെന്ന് അറിഞ്ഞുകൊണ്ടുതന്നെയാണ് അദ്ദേഹത്തിനെതിരേ സമരം ചെയ്തതെന്ന് ഇടതുമുന്നണി കണ്വീനര് പറഞ്ഞതും ഓര്ക്കണം. അവരോടാണ് രാഷ്ട്രീയ കൂട്ടുകെട്ടുണ്ടാക്കാന് ജോസ് കെ മാണിയും കൂട്ടരും തീരുമാനിച്ചിരിക്കുന്നത്. ഇത് മാണിസാറിന്റെ ആത്മാവ് പൊറുക്കില്ല, രാഷ്ട്രീയ വഞ്ചനയാണ് ഇത്- രമേശ് ചെന്നിത്തല പറഞ്ഞു.
കെഎം മാണിയെ കള്ളനെന്ന് വിളിച്ച് അപമാനിക്കുകയും വീട്ടില് നോട്ട് എണ്ണല് യന്ത്രം ഉണ്ടെന്ന് ആരോപിക്കുകയും അവഹേളിക്കുകയും ചെയ്തവരാണ് ഇടതുമുന്നണിക്കാര്. അവിടേക്ക പോകുന്നത് ജനങ്ങള് അംഗീകരിക്കില്ലെന്ന് രമേശ് ചെന്നിത്തല പറഞ്ഞു.