ഡല്‍ഹിയില്‍ ബഹുനില കെട്ടിടം തകര്‍ന്ന് ഒരാള്‍ മരിച്ചു; മൂന്നുപേര്‍ക്ക് പരിക്ക്
ന്യൂഡല്‍ഹി: വടക്കുകിഴക്കന്‍ ഡല്‍ഹിയിലെ മുസ്തഫാബാദില്‍ മൂന്നുനില കെട്ടിടം തകര്‍ന്ന് ഒരാള്‍ മരിച്ചു. ഗുരുതരമായി പരിക്കേറ്റ മൂന്ന് പേരെ ആശുപത്രിയില്‍ പ്രവേശിപ്പിച്ചു. മുസ്തഫാബാദിലെ വ്യാപാരി സുലൈമാന്റെ മകന്‍ സൂഫിയാന്‍(20) ആണ് മരിച്ചത്. സുലൈമാനെയും മറ്റ് കുടുംബാംഗങ്ങളെയും അഗ്‌നിരക്ഷാ സേന രക്ഷപ്പെടുത്തി. ബാബു നഗര്‍ ചാനെവാലി തെരുവില്‍ സ്ഥിതി ചെയ്യുന്ന ഷമീം അഹ്മദിന്റെ കെട്ടിടമാണ് പുലര്‍ച്ചെ അഞ്ചുമണിയ്ക്ക് തകര്‍ന്നുവീണത്.
Delhi | A house collapsed at around 5am from the Babu Nagar Chane Wali Gali Mustafabad. Total 3 fire tenders were rushed to the site. So far 4 persons have been rescued & sent to the hospital. Search for more people ongoing: Fire officials pic.twitter.com/0aVMDURyzM
— ANI (@ANI) July 24, 2022
കച്ചവടക്കാരനായ സുലൈമാനും കുടുംബവും നാലുവര്‍ഷമായി വാടകയ്ക്ക് വസിക്കുന്ന കെട്ടിടമാണിത്. കെട്ടിടാവശിഷ്ടങ്ങള്‍ക്കിടയില്‍ കൂടുതല്‍ പേര്‍ കുടുങ്ങിക്കിടക്കുന്നുണ്ടോ എന്നറിയാന്‍ തിരച്ചില്‍ തുടരുകയാണ്. മൂന്ന് ഫയര്‍ എന്‍ജിനുകള്‍ സ്ഥലത്തെത്തിയെന്നും ഡല്‍ഹി ഫയര്‍ സര്‍വീസ് ഡയറക്ടര്‍ അതുല്‍ ഗാര്‍ഗ് പറഞ്ഞു. മൂന്ന് നിലകളുള്ള കെട്ടിടത്തിന്റെ ഒന്നും രണ്ടും നിലകളാണ് തകര്‍ന്നതെന്നാണ് അധികൃതര്‍ നല്‍കുന്ന വിവരം.