ഉന്നതവിദ്യാഭ്യാസത്തില് സംസ്ഥാനം ദേശീയ, അന്തര്ദേശീയ നിലവാരത്തില് ഉയര്ന്നുവെന്ന് മന്ത്രി ആര് ബിന്ദു
തൃശൂര്: വിവിധ മേഖലകളില് നടത്തിയ പ്രവര്ത്തനങ്ങള് സംസ്ഥാനത്തെ ദേശീയ, അന്തര്ദേശീയ നിലവാരത്തിലേക്ക് ഉയര്ത്തിയെന്ന് ഉന്നത വിദ്യാഭ്യാസ മന്ത്രി ഡോ.ആര് ബിന്ദു. തൃശൂര് ജില്ലാ പഞ്ചായത്ത് ഭരണസമിതിയുടെ ഒന്നാം വാര്ഷികാഘോഷവും വിജ്ഞാന് സാഗറിലെ രണ്ട് സെമിനാര് ഹാളുകളുടെ ഉദ്ഘാടനവും നിര്വഹിച്ച് സംസാരിക്കുകയായിരുന്നു മന്ത്രി. സംസ്ഥാനത്തെ വികേന്ദ്രീകരണ പ്രവര്ത്തനങ്ങള് കേരള മോഡലായി മാറി. ആരോഗ്യ, വിദ്യാഭ്യാസ മേഖലകളിലുണ്ടായ പ്രവര്ത്തനങ്ങള് കേരളത്തില് പ്രകാശ പൂര്ണ്ണമായ മാറ്റങ്ങള്ക്ക് ഇടയാക്കിയെന്നും മന്ത്രി പറഞ്ഞു.
ജനകീയാസൂത്രണ പദ്ധതിയുടെ രജത ജൂബിലി ആഘോഷങ്ങളുടെ ഭാഗമായി ജനപ്രതിനിധികളെ ആദരിച്ചു. രാമവര്മ്മപുരം
വിജ്ഞാന് സാഗര് ഹാളില് നടന്ന ചടങ്ങില് ജില്ലാ പഞ്ചായത്ത് പ്രസിഡന്റ് പി കെ ഡേവിസ് മാസ്റ്റര് അധ്യക്ഷനായി. വൈസ് പ്രസിഡന്റ് ഷീന പറയങ്ങാട്ടില്, ആരോഗ്യ സ്റ്റാന്റിങ് കമ്മിറ്റി ചെയര്മാന് എ വി വല്ലഭന്, ക്ഷേമകാര്യ സ്റ്റാന്റിങ് കമ്മിറ്റി ചെയര്മാന് പി എം അഹമ്മദ്, പൊതുമരാമത്ത് സ്റ്റാന്റിങ് കമ്മിറ്റി ചെയര്പേഴ്സണ് ലതാ ചന്ദ്രന്, വികസനകാര്യ സ്റ്റാന്റിങ് കമ്മിറ്റി ചെയര്പേഴ്സണ് കെ എസ് ജയ, ജില്ലാ പഞ്ചായത്ത് സെക്രട്ടറി കെ ജി തിലകന് എന്നിവര് പങ്കെടുത്തു.