കുവൈത്ത് സിറ്റി: കുറഞ്ഞ ചെലവില് മികച്ച യാത്രാനുഭവം വാഗ്ദാനം ചെയ്ത് കുവൈത്ത് എയര്വേയ്സ് പുതിയ ഇക്കണോമി ക്ലാസ് ഓപ്ഷന് അവതരിപ്പിച്ചു. 'എക്കോണമി ക്ലാസ് വിത്തൗട്ട് ബാഗേജ്' എന്ന പേരിലുള്ള പുതിയ വിഭാഗത്തില് ചെക്ക് ഇന് ബാഗേജ് അനുവദിക്കുന്നില്ല. പരമാവധി ഏഴ് കിലോഗ്രാം വരെ ഭാരമുള്ള ഒരു ഹാന്ഡ് ലഗേജ് മാത്രം യാത്രക്കാര്ക്ക് കൈയില് കൊണ്ടുപോകാം. ചെറുദൈര്ഘ്യമുള്ള ബിസിനസ് യാത്രകള്ക്കും ഭാരമേറിയ സ്യൂട്ട്കേസ് ആവശ്യമില്ലാത്ത സ്വകാര്യ യാത്രകള്ക്കുമായി ഏറ്റവും അനുയോജ്യമായ സംവിധാനമാണിതെന്ന് അധികൃതര് അറിയിച്ചു.
ടെര്മിനല് 4ല് സ്ഥാപിച്ച സെല്ഫ് സര്വീസ് മെഷീനുകള് വഴി യാത്രക്കാര്ക്ക് നേരിട്ട് ബോര്ഡിങ് പാസ് എടുക്കാനുള്ള സൗകര്യവും ഒരുക്കിയിട്ടുണ്ട്. യാത്രാനുഭവം കൂടുതല് സുഗമമാക്കുന്നതും ഉയര്ന്ന നിലവാരത്തിലുള്ള സേവനം ഉറപ്പാക്കുന്നതുമാണ് ലക്ഷ്യമെന്ന് ചെയര്മാന് അബ്ദുല് മൊഹസിന് അല് ഫഖാന് വ്യക്തമാക്കി. വിമാനത്തിനുള്ളിലെ ആധുനിക സംവിധാനങ്ങളും വിനോദ സൗകര്യങ്ങളും വഴി യാത്രക്കാരുടെ സംതൃപ്തി വര്ദ്ധിപ്പിക്കാനാണ് ശ്രമമെന്നും അദ്ദേഹം കൂട്ടിച്ചേര്ത്തു.
പുതിയ ക്രമീകരണത്തില് കുവൈത്ത് എയര്വേയ്സിന്റെ ഇക്കണോമി ക്ലാസ് നാല് വിഭാഗങ്ങളായി തിരിച്ചിട്ടുണ്ട്: ബാഗേജ് രഹിത വിഭാഗം (ഹാന്ഡ് ലഗേജ് മാത്രം), എക്കോണമി സേവര് (32 കിലോഗ്രാം വരെ ഒരു ചെക്ക് ഇന് ബാഗ്), സ്റ്റാന്ഡേര്ഡ് എക്കോണമി (23 കിലോഗ്രാം വീതം രണ്ട് ചെക്ക് ഇന് ബാഗുകള്), എക്കോണമി ഫ്ളെക്സ് (23 കിലോഗ്രാം വീതം രണ്ട് ചെക്ക് ഇന് ബാഗുകള്, കൂടുതല് സൗകര്യങ്ങളോടുകൂടി)