കിറ്റക്സിന്റെ പിന്മാറ്റം: വ്യവസായി ഉന്നയിച്ച പ്രശ്നങ്ങള് ഗൗരവപൂര്വം പരിഗണിക്കുമെന്ന് വ്യവസായമന്ത്രി
തിരുവനന്തപുരം: പ്രമുഖ വ്യവസായ സ്ഥാപനമായ കിറ്റെക്സിന്റെ ചെയര്മാന് സാബു ജേക്കബ് ഉന്നയിച്ച പ്രശ്നങ്ങള് ഗൗരവപൂര്വ്വം പരിഗണിക്കുമെന്ന് വ്യവസായമന്ത്രി പി. രാജീവ് അറിയിച്ചു. മറ്റ് വകുപ്പുകളുമായി ബന്ധപ്പെട്ട് ഉന്നതതല പരിശോധനയും നടത്തും. നിയമപ്രകാരം വ്യവസായ സംരംഭങ്ങള് ആരംഭിക്കാനും നടത്താനും ആഗ്രഹിക്കുന്ന ആര്ക്കും സംസ്ഥാന സര്ക്കാര് പൂര്ണ്ണ പിന്തുണ നല്കുമെന്നും മന്ത്രി വ്യക്തമാക്കി. വ്യവസായ മേഖലയില് ഉണര്വിന്റെ ഒരന്തരീക്ഷമാണ് നിലനില്ക്കുന്നത്. അത് ഉപയോഗപ്പെടുത്താന് ബന്ധപ്പെട്ട എല്ലാവരുടേയും കൂട്ടായ ശ്രമമുണ്ടാകണമെന്നും അദ്ദേഹം അഭ്യര്ഥിച്ചു.
സര്ക്കാര് ഏജന്സികള് തങ്ങളെ വേട്ടയാടുമെന്ന് പരാതിപ്പെട്ടാണ് കമ്പനി 3500 കോടിയുടെ വികസന പ്രവര്ത്തനത്തില് നിന്ന് പിന്മാറിയത്.
കിറ്റെക്സിന്റെ ചെയര്മാന് നടത്തിയ പരാമര്ശങ്ങള് സാമൂഹ്യ മാധ്യമങ്ങളിലൂടെ ശ്രദ്ധയില്പെട്ടതിനെത്തുടര്ന്ന് നേരിട്ട് ഇടപെട്ടിരുന്നു. ഔദ്യോഗികമായ പരാതികളൊന്നും വ്യവസായ വകുപ്പിന് ലഭിച്ചിട്ടില്ലെങ്കിലും ജൂണ് 28ന് തന്നെ കിറ്റക്സുമായി ബന്ധപ്പെട്ട് പ്രശ്നത്തെക്കുറിച്ച് അന്വേഷിച്ചു. വ്യവസായ വകുപ്പിന്റെ നേതൃത്വത്തിലുള്ള പരിശോധനകളൊന്നും കിറ്റെക്സില് നടന്നിട്ടില്ലെന്നും മറ്റ് ചില വകുപ്പുകളുടേയും സെക്ടര് മജിസ്ട്രേറ്റിന്റേയും പരിശോധനയാണ് നടന്നതെന്നുമാണ് അവര് അറിയിച്ചത്. കിറ്റെക്സ് ഉന്നയിച്ച പരാതികള് പരിശോധിക്കാന് വ്യവസായ വകുപ്പ് സെക്രട്ടറിയെ അപ്പോള് തന്നെ ചുമതലപ്പെടുത്തിയിരുന്നു. വ്യവസായവകുപ്പിന്റെ പരിശോധനകളൊന്നും കിറ്റെക്സില് നടന്നിട്ടില്ലെന്നും ഇതുമായി ബന്ധപ്പെട്ട പരാതികളൊന്നും ലഭിച്ചിട്ടില്ലെന്നും സെക്രട്ടറിയും റിപോര്ട്ട് നല്കിയിട്ടുണ്ട്.
വ്യവസായ മന്ത്രിയായി ചുമതലയേറ്റ് 10 ദിവസങ്ങള്ക്കുള്ളില് തന്നെ ഫിക്കി, സി.ഐ.ഐ തുടങ്ങിയ വ്യവസായ സംഘടനാ പ്രതിനിധികളുമായി യോഗം ചേര്ന്ന് തീരുമാനങ്ങള് കൈക്കൊണ്ടിരുന്നു. ആ യോഗത്തില് പങ്കെടുത്ത കിറ്റക്സ് പ്രതിനിധികള് പ്രത്യേകിച്ച് എന്തെങ്കിലും പ്രശ്നങ്ങളോ പരാതികളോ ഉള്ളതായി ചൂണ്ടിക്കാട്ടിയിരുന്നില്ല.
ഇത്തരത്തിലുള്ള പ്രശ്നങ്ങള് പരിഹരിക്കുന്നതിന് ജനാധിപത്യ സംവിധാനത്തില് ധാരാളം സാധ്യതകള് ഉള്ളപ്പോള് അവ സര്ക്കാരിനെ നേരിട്ട് അറിയിക്കുന്നതാണ് ഉചിതം.
വ്യവസായ നടത്തിപ്പിനുള്ള കേരളത്തിലെ ഏകജാലക സംവിധാനം ദക്ഷിണേന്ത്യയിലെ ഏറ്റവും മികച്ചതാണെന്ന് അഭിപ്രായപ്പെട്ടത് ഫിക്കിയാണ്. വ്യവസായ തര്ക്ക പരിഹാരത്തിന് നിയമ പിന്ബലമുള്ള സംവിധാനം രൂപീകരിക്കാന് ഈ സര്ക്കാരിന്റെ ആദ്യ മന്ത്രിസഭാ യോഗം തന്നെ തീരുമാനമെടുത്തിട്ടുണ്ട്.എന്തെങ്കിലും പരാതികള് ഉണ്ടായാല് അത് വകുപ്പിനെ അറിയിച്ചുള്ള പ്രശ്നപരിഹാരത്തിന് ശ്രമിക്കുന്നതാണ് അഭികാമ്യം. അതിനുള്ള സാധ്യത തേടും മുന്പേ സംസ്ഥാനത്തിന് അപകീര്ത്തികരമാകാവുന്ന പരസ്യ പ്രസ്താവനകള് നടത്തുന്നതില് നിന്ന് എല്ലാവരും വിട്ടു നില്ക്കണമെന്നും മന്ത്രി അഭ്യര്ഥിച്ചു.