ബിജെപി സംസ്ഥാന അധ്യക്ഷന് രാജീവ് ചന്ദ്രശേറഖറിനെതിരെ ഡിജിപിക്ക് പരാതി നല്കി കൈരളി ന്യൂസ് റിപോര്ട്ടര്
തിരുവനന്തപുരം: ചോദ്യം ചോദിക്കുന്നതിനിടെ അധിക്ഷേപകരമായി സംസാരിച്ച സംഭവത്തില് ബിജെപി സംസ്ഥാന അധ്യക്ഷന് രാജീവ് ചന്ദ്രശേറഖറിനെതിരെ ഡിജിപിക്ക് പരാതി നല്കി മാധ്യമപ്രവര്ത്തക. കൈരളി ന്യൂസ് റിപോര്ട്ടര് സുലേഖ ശശികുമാറാണ് പരാതി നല്കിയത്. ജോലി തടസ്സപ്പെടുത്തിയെന്നും ഭീഷണിപ്പെടുത്തിയെന്നും അധിക്ഷേപിച്ചെന്നും ചൂണ്ടിക്കാണിച്ചാണ് പരാതി.
ബിജെപി കൗണ്സിലര് തിരുമല അനിലിന്റെ ആത്മഹത്യയുമായി ബന്ധപ്പെട്ട് ചോദ്യം ചോദിക്കുന്നതിനിടെയാണ് കൈരളി ന്യൂസ് റിപോര്ട്ടര് സുലേഖ ശശികുമാറെ അധിക്ഷേപിക്കുന്ന തരത്തില് രാജീവ് ചന്ദ്രശേറഖര് സംസാരിച്ചത്. 'നിങ്ങളോട് ആരാ പറഞ്ഞത്, നിങ്ങള് ഏതു ചാനലാ? മതി, അവിടെ ഇരുന്നാമതി, നീ നിന്നാ മതി അവിടെ. നീ ചോദിക്കരുത്, നിങ്ങള് ചോദിക്കരുത്, ഞാന് മറുപടി തരില്ല' എന്നെല്ലാമായിരുന്നു ചന്ദ്രശേഖറിന്റെ ആക്രോശങ്ങള്. അനിലിന്റെ മരണം റിപോര്ട്ട് ചെയ്യാനെത്തിയ മാധ്യമപ്രവര്ത്തകരെ കയ്യേറ്റം ചെയ്തതുമായി ബന്ധപ്പെട്ട ചോദ്യത്തിന് താന് കാണിച്ചുതരാമെന്ന് രാജീവ് ചന്ദ്രശേഖര് ഭീഷണിപ്പെടുത്തുകയും ചെയ്തു. നിലവില് പരാതി ഡിജിപി ജില്ലാ പോലിസ് മേധാവിക്ക് കൈമാറി.