വയനാട്ടില് മഴ ശക്തം: ഉരുള്പൊട്ടല് സാധ്യതാ പ്രദേശങ്ങളില് നിന്ന് മാറി താമസിക്കണം: കലക്ടര്
മേപ്പാടി: ജില്ലയില് അതിതീവ്ര മഴ പെയ്യുന്ന സാഹചര്യത്തില് ഉരുള്പൊട്ടല് സാധ്യതാ പ്രദേശങ്ങളിലും മുന് വര്ഷങ്ങളില് ഉരുള്പൊട്ടിയ പ്രദേശങ്ങളിലുമുള്ളവര് ജാഗ്രത പുലര്ത്തണമെന്ന് വയനാട് ജില്ലാ കലക്ടര് ഡി.ആര്. മേഘശ്രീ അറിയിച്ചു. കുറുമ്പാലക്കോട്ട, ലക്കിടി മണിക്കുന്നു മല, മുട്ടില് കോല്പ്പാറ കോളനി,കാപ്പിക്കളീ, സുഗന്ധഗിരി, പൊഴുതന പ്രദേശങ്ങളില് അതീവ ജാഗ്രത പുലര്ത്തണം. അപകട ഭീഷണി നിലനില്ക്കുന്നതിനാല് ക്യാമ്പിലേക്ക് മാറാന് ആവശ്യപ്പെട്ടിട്ടുള്ളവര് എത്രയും വേഗം താമസസ്ഥലത്തു നിന്നും ക്യാമ്പുകളിലേക്ക് മാറണമെന്നും കളക്ടര് അറിയിച്ചു. തദ്ദേശ സ്ഥാപന സെക്രട്ടറിമാരും വില്ലേജ് ഓഫീസര്മാരും വേണ്ട നടപടികള് സ്വീകരിക്കണമെന്നും ജില്ലാ കലക്ടര് അറിയിച്ചു.