മുന്‍ ഗ്രാമപഞ്ചായത്ത് വൈസ് പ്രസിഡന്റിനേയും സഹോദരനേയും ആശുപത്രിയില്‍ കയറി മര്‍ദ്ദിച്ചതായി പരാതി
മാള: കുഴൂര്‍ ഗ്രാമപഞ്ചായത്ത് മുന്‍ വൈസ് പ്രസിഡന്റ് എന്‍ ഡി പോള്‍സനേയും സഹോദരന്‍ ജോണ്‍സനേയും ആശുപത്രിയില്‍ കയറി മര്‍ദ്ദിച്ചതായി പരാതി. മുന്‍ വൈരാഗ്യമാണ് ആക്രമണത്തിന് പിന്നിലെന്ന് പോലീസ്. കഴിഞ്ഞ ദിവസം ഉച്ചയോടെ കുണ്ടൂര്‍ വയലാര്‍ ജംഗ്ഷന്‍ പരിസരത്ത് വെച്ച് പാലാപ്പറമ്പില്‍ ഷാജു എന്നയാള്‍ ജോണ്‍സനെ മര്‍ദ്ദിച്ചിരുന്നു. പരിക്കേറ്റ ജോണ്‍സന്‍ മാള സര്‍ക്കാര്‍ ആശുപത്രിയില്‍ ചികിത്സ തേടി. സഹോദരനെ കാണാനായി പോള്‍സണ്‍ എത്തിയ സമയത്ത് ഷാജു വീണ്ടും ആശുപത്രിയിലെത്തി. തുടര്‍ന്ന് ഇരുകൂട്ടരും തമ്മില്‍ വാക്കുതര്‍ക്കമുണ്ടായി. പ്രകോപിതനായി ഷാജു പോള്‍സനേയും ജോണ്‍സനേയും മര്‍ദ്ദിക്കുകയായിരുന്നു. പോള്‍സന്റെ മുഖത്ത് പരിക്കേറ്റിട്ടുണ്ട്. ഇതേസമയം ആശുപത്രിയിലുണ്ടായിരുന്ന പോലീസ് ഷാജുവിനെ കയ്യോടെ പിടികൂടി. മദ്യപിച്ച് അക്രമമുണ്ടാക്കിയ വകുപ്പ് പ്രകാരം കേസെടുത്തതായി മാള പോലീസ് അറിയിച്ചു.