ന്യൂഡല്ഹി: ബംഗ്ലാദേശില് പാര്ലമെന്റ് തിരഞ്ഞെടുപ്പ് നാളെ. 2024 ല് രാജ്യത്ത് വിദ്യാര്ഥികളുടെ നേതൃത്വത്തില് നടന്ന വലിയ പ്രക്ഷോഭത്തിന് 18 മാസങ്ങള്ക്ക് ശേഷമാണ് ഈ തിരഞ്ഞെടുപ്പ് നടക്കുന്നത്. ഈ പ്രക്ഷോഭം പ്രധാനമന്ത്രി ഷെയ്ഖ് ഹസീനയെ രാജിവയ്ക്കാന് നിര്ബന്ധിതയാക്കി. ബംഗ്ലാദേശിലെ അവാമി ലീഗിന്റെ ഭരണം ഇതോടെ അവസാനിക്കുകയായിരുന്നു.
വോട്ടര്മാര് പാര്ലമെന്റ് അംഗങ്ങള്ക്ക് വോട്ട് രേഖപ്പെടുത്തുന്നതിനൊപ്പം, പ്രധാന ഭരണഘടനാ, സ്ഥാപന പരിഷ്കാരങ്ങള് നിര്ദേശിക്കുന്ന ജൂലൈയില് അംഗീകരിച്ച ദേശീയ ചാര്ട്ടറിനെക്കുറിച്ചുള്ള ദേശീയ റഫറണ്ടവും നടത്തും. ഫെബ്രുവരി 13ന് ഫലം പ്രഖ്യാപിക്കും. പ്രധാന മല്സരം ബംഗ്ലാദേശ് നാഷണലിസ്റ്റ് പാര്ട്ടിയും (ബിഎന്പി) ജമാഅത്ത്-ഇ-ഇസ്ലാമി നയിക്കുന്ന സഖ്യവും തമ്മിലാണ്.
രാജ്യത്തുടനീളം ആകെ 42,779 പോളിംഗ് സ്റ്റേഷനുകള് സജ്ജീകരിച്ചിട്ടുണ്ട്, രാവിലെ 7:30 മുതല് വൈകുന്നേരം 4:30 വരെ വോട്ടെടുപ്പ് നടക്കും. ആകെ വോട്ടര്മാരുടെ എണ്ണം 64.8 ദശലക്ഷം പുരുഷന്മാരും 62.8 ദശലക്ഷം സ്ത്രീകളുമാണ്. രജിസ്റ്റര് ചെയ്ത 50 രാഷ്ട്രീയ പാര്ട്ടികളില് നിന്നുള്ള ആകെ 1,755 സ്ഥാനാര്ഥികള് ഈ തിരഞ്ഞെടുപ്പില് മത്സരിക്കുന്നു. കൂടാതെ, 20 സ്ത്രീകള് ഉള്പ്പെടെ 273 സ്വതന്ത്ര സ്ഥാനാര്ഥികളും മത്സരരംഗത്തുണ്ട്. കൂടാതെ, പാര്ട്ടി ടിക്കറ്റില് 63 സ്ത്രീകള് മാത്രമാണ് മത്സരിക്കുന്നത്.